男人的Fantasy (一八零)走過多少個世界盃？
網上資料圖片
喺大家都係三十八歲嗰一年，阿俊同詩慧終於都要去到離婚嘅一步。拍拖十六年，結婚八年，由中三開始初戀嘅佢哋，從來都無諗過，大家會相對無言到去到呢一個地步。
生活已經無任何激情，唯一剩低嘅感情，亦都因為年月裡面嘅爭執，而消耗得七七八八。思慧決定搬走嘅一晚，阿俊望住佢執嘢，一言不發地對住個電視。呢一日係五月廿六號，仲有五個鐘頭就係歐聯嘅決賽。
思慧行出大廳，正要收拾電視櫃上面嘅相架時，佢見到電視機入面足球節目，正喺度介紹緊一個佢同阿俊都好熟悉嘅球星。
「估唔到施丹都做咗教練。」思慧說來，無限感慨。
「係啦，今年世界盃都無哂呢類型嘅十號仔喇。」
聽到阿俊講起「世界盃」，思慧望住佢，好耐先講出一句：
「今年陪唔到你睇世界盃喇。」
「嗯，係。」阿俊垂低頭，輕輕咁回應。
氣氛有啲尷尬，思慧打圓場，隨便咁問咗一句：
「丫，你話我哋一齊睇咗幾多次世界盃呢？」
「七次。」阿俊回答嘅速度，係超出思慧嘅預期。佢哋互相望住大家，時間又好似返到去佢哋第一次嘅約會。
當年係1994年，美國世界盃正進行得如火如荼，思慧嘅爸爸因為屋企錄影機壞咗，睇唔到羅馬尼亞對阿根廷嘅十六強大戰。阿俊一早就睇上思慧，立即以借錄影帶為名，第一次約思慧出街。
1998年，已經拍拖四年嘅佢哋，喺法國世界盃舉行期間，慶祝阿俊嘅十八歲生日。思慧用自己半個月嘅零用錢，去到旺角興發，買咗一件法國國家隊十號嘅施丹，做阿俊嘅生日禮物。
2002年日韓世界盃，啱啱大學畢業嘅佢哋，就喺理工外面嘅廣場，著住畢業袍咁一齊為阿俊切蛋糕。可惜天公不造美，天突然落起大雨，最後思慧淋病咗，阿俊為咗照顧佢，而錯過咗朗拿癲奴笠死施文經典嘅一球。
2006年，係佢哋第一次同居嘅情況下去睇世界盃。望住施丹決賽上嘅結局，思慧喊咗好耐，仲因為馬達拉斯而討厭意大利。有一段時間，佢仲晚晚煮意大利粉，但阿俊到宜家都仲未明係咩意思。
2010年，佢哋選擇咗喺世界盃期間結婚，最怕麻煩嘅阿俊選擇咗旅行結婚，而地點正正係舉行世界盃嘅南非。呢一年，係佢哋第一次現場睇世界盃。睇住西班牙舉起大力神杯嘅一刻，阿俊向思慧講過：「希望呢一刻永遠都唔會完結」
2014年，阿俊出發西安公幹，整整一個月嘅世界盃都同思慧鬧交，每日大家都只係以WhatsApp去聯絡，僅只如此。
2018年，走過二十四年，七次世界盃，大大小小幾百場世界盃比賽嘅今日，佢哋嘅感情，未等到世界盃開幕，就已經要落幕。
思慧行返入房，眼紅紅咁繼續執行李，突然間，佢記起自己收起嘅一份禮物，佢正打算拎俾阿俊時，已發覺阿俊企喺自己身後。
「送俾你，你就嚟生日。」思慧遞上禮物。
「唔使喇，我唔要。」阿俊搖頭
「要啦，都買咗。」
「唔係……最好嘅生日禮物，其實我已經一早收咗。」阿俊掀起外套，露出裡面嘅一件波衫。呢件波衫，就係當年思慧送俾佢嘅法國國家隊。
佢哋兩人對望，故事我想俾大家幻想落去。世界有乜嘢事係唔可以解決？又或者有乜嘢事係你地唔記得？唔緊要，只要你細心用十五分鐘時間，諗一下你用咗幾長時間去經營呢件事，佢陪你走過咗幾多年月，渡過幾多好與唔好，十五分鐘之後，你可能會執得返，一啲你本來已經跌咗嘅事，
或者一段關係。
薛可正Facebook Page
http://www.facebook.com/sithoching