男人的Fantasy (一八一)今餐唔好同我爭
網上資料圖片
老實講，我最憎就係喺餐廳，見到喺兩條友你爭我搶，用最高昂嘅聲調，喺百幾二百人食緊飯嘅環境下，不停咁大叫：
「我俾！我俾！」
「嗱！你試吓同我爭吖！」
「阿姐妳唔好收佢錢呀，下次我唔嚟架！」
「下次你嘅！下次你嘅！」
做人係咪要咁偽善，咁鍾意埋單我俾埋我嗰張你埋丫！
咁大個人無話好好商量，傾吓一人一餐唔得咩？講到底又咪係怕無面，一係怕欠人人情，唔好話我睇死你哋丫！
「爭埋單」呢種劣行，根本就係人性陰暗面嘅極致，假面具嘅最高階層、算盡機關嘅最真實表演。
當你一諗到「如果呢餐我唔請，容乜易佢會覺得我撈得唔掂？」，呢係你已跌入咗「比較」呢個無間地獄。當你一覺得呢個「比較」有機會成立，即係其實你一早喺心入面已經存在咗呢隻魔鬼。
你係咪曾幾何時見人哋手上面隻「撈」唔見咗，就懷疑人哋經濟出現問題？
又，你係咪曾經見到人同條女無啦啦去歐洲睇歐聯決賽，就心諗「你條友咁廢點解可以咁樣去玩？」
憎人富豪嫌人貧係我哋與生俱來嘅本領，有啲人聰明天生掩飾得好，有時憎得嚟唔係咁著跡，但每個人唔多唔少點都有啲呢種性格。
得嘞得嘞，你真係冇呀，我信喇你不食人間煙火㗎嘛。
亦都係呢種反射，所以我討厭「爭埋單」，認為呢個行為，只係想喺「比較」呢個擂台上面唔好失咗先機，唔爭人一餐，就永遠唔使怕俾人覺得你唔掂。
所以本人係從來唔爭埋單，我只會記得邊個朋友係好客，邊一個真係怕招呼得唔好，又或者邊一個朋友，老早就已經跌入咗「比較」嘅地獄。
我有時會打俾最好嘅朋友，第一句就問：
「今晚請我食飯得唔得？」
呢一句係試驗友情嘅最好方法，因為最好嘅朋友，多數都係邊鬧邊請，再篤住你數你聽你仲爭佢幾多餐。
無不勞而獲嘅愛，先係最真實，最持久。
薛可正Facebook Page
http://www.facebook.com/sithoching