男人的Fantasy (一八二)一句殺死中年男人
網上資料圖片
最近都鍾意寫男人嘅中年，因為感覺愈多，手就寫得愈順心。「中年男人」呢個專銜係兩面刃，可以強壯到不可思議同排除萬難，但同時亦可以脆弱得一彈即球，薄如蟬翼。
點解呢個階段嘅男人會咁古怪，原因好簡單，因為呢個年紀嘅男人，係面對最多問題嘅時期，最容易冧同埋否定自己嘅時期；但同時，亦係最多人需要你，你最唔可以瞓低嘅時期。
就好似冰同火、天同地，兩極，但存在。
有一個男人，每個月人工五萬，但一家大細開支接近人工嘅九成半。七十歲嘅母親最近身體抱恙，去完法國醫院驗身，用咗十萬蚊，報告仲未出。有一日男人返到公司，聽到人事部同事講，公司可能喺月底裁員。三個鐘頭後，男人喺公司大廈頂樓，留低一封遺書就跳咗落嚟。
又有一個男人，由細到大都不務正業，人生去到三十幾歲都仲係要問阿媽拎錢。正到佢神奇地遇上一個好女仔，神奇地唔小心做咗老豆，再睇住個仔神奇地出咗世。佢變成一個朝早六點就起身返工嘅男人，一日兩份工，去到凌晨放工返屋企都仲要餵埋夜奶先肯瞓嘅好爸爸。
再有一個男人，父母高齡時生咗佢出嚟，搞到佢大學畢業時老豆老母已經七十歲。呢個男人辛辛苦苦咁打住份工照顧多病嘅兩老，好快咁過咗十年，三十幾歲嘅佢終於都要告別兩老，喺失去母親後一年嘅佢，喺完成父親嘅葬禮之後返到屋企，佢感覺到前所未有嘅失落。一直都唔敢拍拖，不斷埋怨雙親帶俾佢負擔嘅佢，終於知道一直支撐住自己生命嘅，係照顧父母呢個無人可以代替嘅使命。三日後佢燒炭自殺，但好彩最後俾鄰居發現。喺醒返一刻，佢記得昏迷期間父母向佢講嘅每一句說話，然後佢再學習，開始自己另一個人生。
男人嘅人生大多都係咁樣，路上總有一個未知嘅問號，呢個問號可能會推翻你前半生嘅所有觀念，推得過你就會再踏前一步，捱唔過你就會不斷否定自己，直到變成毫無信心嘅一日。
所以一日到黑都想求變嘅你唔使怕，作為一個男人，前面總有一個關口，去考驗你下半世，將會變成一個乜嘢嘅人。
薛可正Facebook Page
http://www.facebook.com/sithoching