男人的Fantasy (一八三)小賭怡情
網上資料圖片
講到明，呢一篇唔係馬會嘅廣告，只係人生總有好多關卡，點樣去面對，就係我哋人生路上嘅關鍵。
世界盃開幕前，我已經同女朋友講定，問佢可唔可以陪我睇世界盃。點知得返嚟嘅回覆，係佢一面無奈咁話：「我陪你睇歐聯決賽已經好厲害，世界盃咁多場好難捱喎。」
都啱嘅，換轉佢叫我陪佢睇國際眼妝大賽或者係亞洲天天P圖大賽，仲要一睇睇個幾月，我都會有佢嘅反應。不過我個人一向都認為，「共同話題」係每一段關係嘅靈丹妙藥，呢個四年一度嘅盛事，就算佢唔鍾意睇，慢慢去帶佢感受一吓，話唔定佢會愛上。
要愛上一樣新事物，最好就係將自己同佢拉上關係，所以我諗盡方法，希望將佢同世界盃可以搭上第一個橋樑。
最後，我喺網上面見到兩句對話，頭上面盞燈就「叮」一聲著咗喇：
「點解最近每個人都討論世界盃？」
「你買兩佰蚊試試就知。」
無錯，既然世界盃同女朋友嘅人生性格愛好專長都扯唔上關係，我就由最直接嘅原點進攻，將世界盃同佢嘅金錢扯上關係。
我開始日日喺佢身邊同佢講賭波嘅好處，仲成日拎啲FACEBOOK上面朋友50蚊中咗3000蚊嘅相俾佢睇，為嘅當然係牽動埋藏喺佢心入面嘅貪念。我每日咁分享，日日咁講邊個邊個中咗幾多千蚊幾多萬蚊，終於有一日佢問我：
「乜世界盃真係咁易中架咩？」
就係咁，佢就跌入咗我嘅圈套入面。佢由最初嘅買十蚊試試，到後來識得打電話俾我問「今晚波蘭讓半球，我想買50蚊上盤你話唔好呀？」，十足十成個外圍佬咁日日打俾我報盤，買完又會聚精匯神咁隊隊睇住，仲投入過我。
但佢同眾多港女一樣，成個世界盃知道有好多靚仔，但認得出同講得出個名嘅都係得C朗同美斯。佢係一個美斯迷，成日問我知唔知美斯嘅歷史，問我點解成日都好似唔太鍾意美斯咁。
我叫佢除咗睇美斯歷史之外，仲睇睇世界盃嘅歷史，睇睇二十年前英格蘭係點樣出局，佢就知道，我點解唔鍾意美斯，點解會喺佢射失十二碼之後叫到好似中咗六合彩一樣。
唉，希望今年英格蘭唔會對阿根廷啦。
薛可正Facebook Page
http://www.facebook.com/sithoching