男人的Fantasy (一八四)與爸爸的世界盃回憶
網上資料圖片
世界就好似一個時間錦囊，四年一度定期一次，令我有某啲回憶，都定期出現一次。不過回憶隨年月會有改變，以前係苦，但原來慢慢會變甘。
睇住德國輸俾南韓嘅一場波，我又記起二十四年前喺美國嘅盛夏，呢兩個國家都曾經大戰過一次。
其實我阿爸唔係一個足球迷，對足球係完全唔識咁滯。我聽阿媽講過老豆後生時有踢過吓波，但我估只係嗰啲成班麻甩佬無嘢做又無嘢玩，落樓下球場追住個波踢吓，總好過喺屋企發呆嗰一種。
亦因為阿爸唔愛好我就無接觸，喺我世界入面係無足球，直到我十五歲，亦即係1994年美國世界盃舉行前，我先學識睇波。
嗰一年世界盃喺美國舉行，時間同亞洲正好就係一個日頭一個夜晚。啱啱學識嘅我就覺我非常難捱，但又因為想搵個話題同朋友們傾吓，所以唯有每晚都自己睇。
當時我記得阿爸每晚都會錄波，係呀無錯，佢係用現今已經視為文物嘅錄影機錄波，但等每日放工返嚟番睇。我哋兩個一早一夜，喺呢個世界盃入面一直都無咩交接。
就喺呢一晚，南韓對德國。正當我一個人又準備拎大量嘅薯片同汽水自己睇波時，阿爸由佢嘅房行出嚟，經過我再行去廁所。我第一個反應，就係拎起遙控，將電視聲較到最細。每一個小朋友都會試過呢個感覺，半夜睇電視同父母瞓覺嘅深層程度，一直都係如影隨形，永遠同行。
阿爸去完廁所返嚟，竟然無返入房。佢坐咗喺我身邊，然後細細聲咁問我：
「今晚乜嘢對乜嘢？」
我有啲開心，立即答佢：
「南韓對德國呀，爸爸。」
「嗯…………」阿爸望望我，然後望望我身邊嘅零食，又同我講：
「食完記得刷牙先瞓呀。」
「知道。」
講完兩句，我就開始睇波。阿爸從來都無陪過我睇波，所以我對首次兩父子並排咁睇波覺得好快樂。記住唔係開心，係快樂。
「阿爸，你唔使返工咩？」我忍唔住問佢。
「今日飲X咗杯齋啡，瞓唔著。」
「哦。」
呢一場比賽我特別深刻，因為我同阿爸兩個新手，一直討論住一啲不著邊際嘅足球事。例如再四年前喺90年世界盃吐口水嘅係唔係和拉、奇連士文最後嗰腳金球係唔係符碌、亞洲球隊點解一定唔夠歐洲球隊踢之類嘅話題。
比賽完咗之後，阿爸起身走返入自己房門，閂門前又用佢獨有嘅語氣同我講多次：
「記得刷牙，唔好車大炮呀吓。」
「哦………知道。」
好多年來，每次我諗起呢件事都覺得好苦。世界盃一直舉行，但我同阿爸已經唔可以再多睇一場比賽。但慢慢時間沖擦，我發覺所有人同埋事都係一個過程，好好咁發生、經過、記低，成為一件我哋喺人世間最寶貴嘅點滴。
不需累積，有發生過就好。
薛可正Facebook Page
http://www.facebook.com/sithoching