2018/08/17

男人的Fantasy (一八九)《煩惱皆因有得揀》

download-4
 
網上資料圖片
 
最近成日睇FACEBOOK上面啲當年今日,有時睇吓五十年前嘅香港街道,又或者係三十年前嘅飲食業面貌。一路睇嘅時候,自己都有好多畫面,呢度又好似同阿爸阿媽去過,嗰度又好似細個喺電視見過呢個廣告。
 
直到我見到一張幾十年前公屋康樂設施嘅舊相,見到入面班小朋友玩得好開心嘅樣,我就不期然諗起,點解生活總係好似以前比較開心?
 
明明以前個世界就好簡陋,人少車少樓又矮,屋企錢唔多玩具唔多娛樂唔多,悶到隔離屋玩咗部大雪櫃,我哋執佢個紙皮盒都可以玩一日,咁貧乏嘅生活,點解總係快樂過宜家。
 
我有一段時間會用「過去總是美好」嚟糊弄呢一件事,但慢慢我先發覺,係心態問題。個道理又圍繞返萬能嘅「半杯水理論」入面,到底係「得到」快樂,定係「知足」開心。
 
細個屋企窮,社會亦都未有咁發達,一個長假期入面,陪住我同一班朋友嘅,除咗一堆可能會出現嘅爛紙皮,就只有得返波子。眼前嘅娛樂就係咁少,但成個暑假你總得要過,暑假又點可以唔開開心心呢,就係咁,一班細路就會兜住喺成座樓入面搵玩意,有時係諗諗波子新玩法,有時係捉吓伊因。
 
「放假應該要開心」呢個諗法,又簡單又堅持。
 
一班小朋友長大,大家都有大家一片天,科技一日千里,到咗今時今日,我哋一班人溝通得最多嘅地方係WhatsApp,講得最多嘅話題,係「幾時出嚟聚聚?」
 
好多次試過大家飲一餐茶,都可以拗到面紅耳熱,呢個平日冇時間,嗰個放假要去旅行。順手拈來嘅事太多,我哋好似忘記咗人生最重要,而又曾經發生過嘅美好,到底對我哋人生仲有冇意義。我哋有太多選擇,聚舊係唔係必要嘅事。
 
有時就算係飲一餐茶,明明約好一個地方,但世界上有OPENRICE呢個APP(非廣告),又會有人覺得有好多選擇,不停咁「不如試呢間、不如去嗰間」。就係咁唔記得有幾多次,我哋因為有選擇而慢慢將件事變質,最後失去初衷,最後不歡而散。
 
然後又因為科技,我哋好容易就識到新朋友,上網約吓踢波,又或者係去群組傾吓打機,我哋又可以識到一班新朋友。慢慢覺得舊朋友太煩,點解我唔可以有更多選擇。
 
然後到某一日,我哋睇到FACEBOOK上面某一啲舊照片,又記得呢一班舊朋友,慢慢諗當初自己有得揀,最後忘記咗,其實我哋有好多事,都唔需要太多選擇。
 
薛可正Facebook Page
http://www.facebook.com/sithoching

COMMENT