男人的Fantasy (一九三)三十歲仲要望個天打風山嘅男人都係廢物
網上資料圖片
「山竹」吹到嚟香港，風未到但消息喺一個星期前就已經到咗。呢個時間各大天氣專家呀、黃子華「打邊爐都耐過你打風」嘅粉絲呀，仲有一眾天文台死敵都喺facebook耀武揚威，當中有唔少人仲為呢個風而高興。
「因為打風而有假期」呢個說話我係表示理解，我細個時都成日唔想返學，無啦啦多一日假期嘅感覺係開心。但呢啲年少無知嘅諗法，好多人延續到已經唔係年少，但依然選擇無知嘅思想，每一次見到我都不敢搖頭。
我facebook有一位朋友係咁講：
「好好好，一個山竹你起碼幫我拎到一日假，再加上幫我吹冧哂啲超支工程，嚟個四關全破就最好喇，哈哈哈。」
我喺文字上睇唔到佢句「哈哈哈」有幾真情流露，但我一直都喺度估計緊，到時無啦啦多一日可以令一個1984年出世今日已經三十五歲嘅中年單身男子有幾開心。你咁恨放假咪拎日大假囉，再唔係去輪個街症扮病，一日假講緊都係八個小時工作加兩個小時來回嘅著數，做人係咪要冇大志到咁呀？
十幾廿年前，科技未發達，我哋打風最多都係睇住電視，無線個新聞影到乜我哋就睇乜，唔知外面世界係點係好正常。到咗今次今日，連個風眼都可以直播俾你睇住，早一個月日本又俾風災困擾，大自然嘅力量係無人可以估計，仲有人可以為咗嗰幾個鐘私慾，而想個風打得成，咁樣嘅人生係咪太無用，太過認命？
只不過，係因為當時人知道自己身處咩地方，香港打風正所謂窗都唔使怕會爛，唯一擔心就係怕屋企啲肥牛唔夠，個邊爐打唔夠十二個鐘唔得盡慶；又或者係三缺一，阿強個衰仔唔知使唔使返風更，一早都話咗唔好做物業管理啦打風都要返，我真係望得到打得成個風都益唔到你啦衰仔。
我唔敢講自己係偉大，但呢一種諗法係會傳遞，因為見唔到風災真正慘況，我哋可以輕易咁想個風打得愈勁愈好；因為見唔到污染，所以我哋可以順手拈來好多本來唔需要用嘅奢侈品。生命只係停留喺眼前呢一格，呢一種生命係幾短視，而且幾咁無能。
有人可能會話「超，講吓唔得咩？我話打風就真係打風咩。」，我會答你「超，寫吓會寫到你斷氣呀？我寫幾隻字唔通你真係會即時變個啡膠樽咩？」
薛可正Facebook Page
http://www.facebook.com/sithoching