男人的Fantasy (一九四)中年危機
網上資料圖片
數吓數吓，細佬下年都四十歲，二十歲後日子過得快，呢句說話一啲都無講錯。
仲記得我二十歲前一臉稚氣時，成日開口埋口都話好想大個，過咗二十歲後好少再講，因為慢慢發現成長已經好急速咁嚟到。
男人成長唔係聽內在，而係睇身邊啲人生大事陸續出現，呢啲事仲多數都係壞事嚟，就好似月曆咁，撕完一張又一張，發生又一件又一件嘅大事。
甩頭髮、煩結婚、想生仔、腰骨痛、親人離世、想買樓、搏升職、好耐無踢波、老花、朋友離世⋯⋯
忙到咁，「希望成長」呢啲陳腔濫調就一早已收咗皮，直到望住塊鏡發現自己唔係好夠頭髮梳中間界時，「成長」呢個幸福詞幾乎就要喺你人生避席。
就好似過山車上斜，慢慢上到最高時，我哋企喺應該係人生睇嘢最清楚嘅位置，更加開始意識到，跟住落嚟嘅路應該就好似衝咁快。
因為會好快所以要加倍努力？
因為會好快所以做嚟都冇用？
嚟到三十九歲唔知幾多日嘅我，突然有一日諗到呢個問題。去到呢個年紀，如果你哋唔係劉鳴煒同蔡加贊嘅話，人生幫到你哋嘅助力應該已經消耗得七七八八，正常仲會傷痕纍纍嘅呢個歲數，你哋身上嘅係成就多啲定係包袱多啲？
係咪開始唔係好睇得順眼電視入面班小鮮肉？就算你表情幾輕視都好，見到佢哋動作咁靈活、髮線咁低，個心總係有一絲痛，記起上個星期自己跳個欄杆都扭親條腰，再記起二十年前嘅你陸運會點樣橫掃全場。
又或者係公司入面有個二十歲嘅新職員，你見到佢哋一個月搵兩萬，但係用咗兩萬三去食玩買，朝朝八點返到公司都聽到佢同其他人講尋晚飲完酒就返工，你見到佢個樣咁精神，個心已經有一絲嘅厭惡，跟住就算佢做嘢做得有幾醒目，完全無受玩一晚嘅影響，你都覺得呢個同事好唔順眼。
渴望見到從前嘅自己但又害怕只得喺其他人身上先見得返以前嘅自己；或者喺仲未「時不與我」嘅年紀，你於已經濃烈地感受時不與我，呢啲大概就係其中一種中年危機。
「時間仲有幾多」同「人生浪費咗幾多時間」呢兩個問題會纏繞住我哋，嗰種無力感會一直吞食我哋，覺得前路好黑好無辦法；但突然間又會諗呢條路人生千百萬人都行過，大部份行得好好，點解我又會特別差？
呢種介乎想死又唔想死嘅狀態係最糾結，但計我話太陽底下真係無新事，唔孤單嘅路永遠都最易應付，覺得困窘時適當咁搵人抒發下，危險感好快就變成一個動力，畢竟不惑之年都仲係年青，一個唔覺意好似誠哥咁要做到九十歲，你仲有五十年要捱，俾心機！
你哋睇吓，我呢一刻又幾咁樂觀⋯⋯
薛可正Facebook Page
http://www.facebook.com/sithoching