男人的Fantasy (一九五)玩具快樂
圖片來源：Hot.kenobi
「老闆，今朝又出咗個限量版周星馳嘅至尊寶figure喇。」
「死肥仔，其他嘢無見你咁早，睇玩具就咁早識入我房搵我。樣板就話靚啫，大貨都靚咩？」
「靚到七彩。」
「幫我訂個，送公司唔好送屋企，一陣俾我老婆簽收咗又拎俾我個仔玩到分屍。」
「哦，知道。」
一分鐘之後，肥仔仲企喺我面前無出返去。
「做咩仲唔走呀，有嘢衰咗呀又？」
「黃生，我今個月……又唔夠數……」
我大約知道肥仔會同我講咩，因為佢口中所講嘅「唔夠數」幾乎個個月都會出現。其實有好多人叫我炒咗肥仔，養一個對公司無好處嘅人，唔會幫到我。
我望住肥仔，再望住佢身後面個玻璃櫃。櫃入面有好多figure，大部份都係肥仔幫我上網買，佢喺我公司做咗兩年，短短時間內已經幫我買咗差唔多四十個返嚟。
呢兩年我喺公司最大嘅變化，就係間房愈來愈細、業績愈來愈好、職位愈來愈高仲有脾氣愈來愈細。我以前脾氣好大，年少有為目中無人，以為跑到幾條靚數就目空一切，我曾經試過一個星期之內炒咗十八個下屬，佢哋未必個個都無用，但佢哋頂撞我，就唔可以喺呢度生存，至少我以前係咁諗。
嗰段時間係我搵錢搵得最多嘅日子，但亦都係我最唔開心嘅日子，全個世界無人明白我，我喺我嘅世界入面就係上帝，我操生死大權，我想點就點，我唔知自己啱唔啱，但連我太太都曾經講過我係一個好難相處嘅人。
嗰段時間我每晚都會去飲酒，飲完就返公司，等到半夜先返屋企。有一晚，我喺外地返香港，落機就應酬班客，飲酒飲到十一點鐘散場，返到公司嘅時候，我見到第一日返工嘅肥仔。
「同事，咁夜嘅，你真係勤力。我叫阿樂呀，今日第一日返工，不過你可以叫我肥仔。」
喺公司，好少人夠膽同我講多過十個字嘅句子。
「你做咩唔返屋企呀？」
「我屋企無上網丫嘛，同埋我老豆好早瞓，屋企又細，返到去都係嘈住佢，咪喺度睇吓玩具囉。」
「玩具？」
「係呀，我好中意figure，好多組典嘅電戲人物都好正。你睇吓呢個鐵血戰士，造功好價錢又平，入得過呀。」
我細細個同阿爸都有睇過呢套電影，望住電腦入面隻公仔，再望住肥仔講到噴哂口水好似推銷員咁嘅口脗，唔知點解我感覺到一種好耐無出現嘅平靜。我坐低同肥仔慢慢傾，佢就好似一個專家咁，不斷同我講呢隻Ironman有咩唔好，嗰隻寧采臣點解一定要買。
最後我終於知道，呢種係乜嘢感覺，呢個係細細個同朋友一齊睇玩具嘅感覺。大家無分你我，喺同一份玩具前面，發出同一份奢望，希望可以成為呢件玩具嘅主人。
就係咁，我同肥仔睇咗一晚玩具，臨走前，佢仲同我講：
「死嘞，聽日遲到都唔知點算，我今日仲未見過我阿頭，好驚第一日見佢就係俾佢炒。」
我笑一笑咁搭住佢膊頭同佢講：「放心，我同佢好熟，你就算遲到佢唔敢郁你。」
「你係至好呀你。」
哈哈哈哈哈哈哈
「黃生……黃生………」
肥仔一句，又將我由兩年前回憶拉返嚟現實，我望住佢好驚慌嘅樣，都唔知好嬲定好笑。
「你邊個月夠數，下個月你好勤力啲，唔係我炒咗你呀。」
「知道喇。」
個個都話肥仔無用，但我望住堆玩具笑一笑，全世界嘅人睇嘢都睇表面，可能肥仔自己都唔知，佢嘅作用，就係幫我搵返我一早唔見咗嘅嘢，一份可以令我繼續快樂嘅感覺。
薛可正Facebook Page
http://www.facebook.com/sithoching