男人的Fantasy (一九六)年少有為
網上資料圖片
唔知大家最近有冇聽過李榮浩嘅「年少有為」，喺幾個星期前我表弟介紹完俾我聽之後，我就一徘徊喺呢首歌嘅世界入面。
「假如我年少有為 不自卑」
喺呢個世代，有幾多個真係可以年少而有為，蔡加贊唔得，劉鳴煒都唔算。男人由年少開始就追求世界嘅認同感，由自身去到整體成就，職位高唔高，搵錢搵得多唔多，都係佢哋踏入成長路嘅一個關口。呢種經驗係好折磨，因為幾乎十個有九個男仔都會覺得自己有不足，會周圍同人比較，最後慢慢產生一個好普遍嘅心態
「自卑」
「假如我年少有為 知進退」
男人一自卑就會做錯好多事，「被比下去」嘅感覺足夠令一個男人即時有精神病，職場上可以，愛情路上更加容易，所以好容易就會做錯決定，會錯過一啲機會，或者係一啲原來對你好重要嘅人。
喺我聽咗呢首歌500次嘅時候，先發現原來呢首歌嘅MV係由林雪做主角，MV入面嘅佢身光頸靚，有大屋有老婆有仔女，就係無開心。我夠膽講100個男人入面，有100個心入面都會有一個禁區，禁區入面放嘅，都係一啲少年時候錯過咗嘅人，同埋一啲已經追唔返嘅回憶。
有啲唔好彩嘅，已經搵唔返嗰啲人，你想望吓佢都無機會；而好彩少少，就好似MV入面林雪咁，坐住架年青時諗都無諗過嘅車，去偷偷哋睇一個已經失去連繫好多年嘅人。
「金錢地位 搏到了卻好想退回」
MV入面，林雪同「那一位」最後有一個眼神接觸，最後大家茫然，而且一如以往，大家連上前講一句嘅勇氣都無，最後慢慢退場。
退出相遇嘅場地，退出彼此嘅世界。
有時就係因為重要，我哋先唔敢輕易去開始作出改變。年少時所有嘅回憶同遺憾，都係我哋呢一生最好嘅禮物。食過幾好味嘅美食你記唔到一世，著過幾名貴嘅衫你都記唔住永遠，但刻骨銘心而痛苦嘅遺憾，我哋足夠一世回味，永不變質。
有時你哋可能會諗，存在住一段咁嘅回憶會對自己現任好唔公平，你正一傻豬嚟，你老婆或者妳老公，咪一樣有一段咁嘅過去唔話俾你知，陪佢哋年少有為嘅人早早就唔見咗，而家佢同你哋一樣，都係想專專心心咁經營埋下半生，年少有冇為呢啲問題得閒先拎出嚟諗吓，最緊要唔好晚節不保呀。
薛可正Facebook Page
http://www.facebook.com/sithoching