男人的Fantasy (一九七) 《投注站嘅感情》
網上資料圖片
我唔太中意賭錢，對上一次入錢落戶口係今年年中世界盃嗰時，但我好中意去投注站，如果路經一啲地方會經過投注站，好多時我會選擇行入去，特別係跑馬嘅日子，人來人往，一大班麻甩佬喺度講粗口，感覺好正。
有好多女人唔中意人多嘅投注站嗰種麻甩味，呢樣都係正常，我細個都唔中意，因為好臭，成日都要單手掩住個鼻喺門口等。有時一等就唔知等幾耐，就會望住門口賣筆個阿叔做生意，又或者係睇住企喺街邊啲阿伯阿叔哭馬喪，我特別中意聽到佢哋輸錢時嘅投訴，好唔理智但好人性化：
「我老婆今朝死都要我幫個仔睇埋啲功課，成堆書放我面前，輸輸聲今晚點會有運行丫。」
「今晚買告東尼啦，我收到風佢哋馬房咁咁咁咁咁呀。」
「挑~~~你，唔係中腳我收成皮嘢啦。」
呢個係一個男人嘅世界，就好似踢波釣魚呢啲活動，係真正屬於男人嘅空間，我好細個望住佢哋就覺得，喺呢個地方，佢哋有佢哋真正嘅快樂，
雖然有可能會輸到仆街。
「正，走喇。」好多時我諗到入神時，你都會喺投注站行出嚟，用手拍拍我個頭就叫我跟住你一齊走。你從來都唔會拖我，就算人幾多你都只係會不斷提我唔好走失。呢個係你嘅性格，亦都因為呢個性格，令我由細到大認路都好叻，因為係你將我訓練成獨立。
後來我大個，我無跟你去投注站，但廿幾歲嗰時，馬會有網上戶口，你開始叫我教你，然後我哋兩個喺大型嘅足球比賽時一齊買波嘅畫面，我依然記得好深刻。我記得最後一次用你戶口，係我叫你教我買一條8X52定56嘅飛，我問你點計，你問我啲波係咪真係準，我問你戶口有幾多錢，你話有三千幾蚊，最後我用咗你二千幾蚊去買仲一關都唔中，從此你就無再俾我用你戶口，直情提起都會鬧到飛去。
十年前，你離開咗呢個世界，我耐唔耐都會諗，你走之前個戶口會點處理，你一世人最中意就係賭馬，細細個帶我去馬會，叫我門口等你你行入去入錢；成家人食飯時，你會突然衝出去電視度，大力襟住其他馬大叫「上呀!上呀!」，令到唔識賭馬嘅我，同賭馬呢樣嘢有一份特別嘅感情。細個覺得你爛賭，但大個覺得呢個先係古肅嘅你一個放鬆嘅方法。
到咗而家，有時我都會特登行入投注站，但喺度望吓門口賭到天昏地暗嘅麻甩佬，我知道我唔會再喺呢度見到你，但有時見到啲小朋友喺門口，我都好似見到自己細個一樣。
唔同嘅係，好多爸爸一出嚟都會拖住個小朋友離開，望住佢哋嘅背影，我就覺得，我同你，呢世人點都係爭少少嘢，先叫得上係完整。
薛可正Facebook Page
http://www.facebook.com/sithoching