男人的Fantasy (一九八) 《相信難》
網上資料圖片
細個同啲小朋友玩，覺得合作同信任係一件美事。
「我哋一齊玩丫。」
「喂，我哋爭一個人呀，一齊踢波吖。」
「得啦，實幫你做好份功課佢嘅。」
我哋成日嚮往童年，除咗因為喺成人世界太大壓力之外，仲有就係，童年包圍住我哋嘅，總有好多赤子之心。成日都聽到好多大人嗌「好攰」，係我哋生活得好攰、返工返得好攰，同埋信人信到好攰。
信人有幾攰？信任人本身呢個動作唔攰，但信完人又信錯人，個心掏到空咗之後又要再加把勁去重新信人，週而復始咁樣去做，的確真係會幾攰。
個感覺似咩呀……嗯，應該係好似砌積木咁，砌完一次又俾人推冧，好好心機咁再砌一次，又俾人推冧。而已你更加會發現，喺呢個咁洩氣嘅過程，你慢慢發現，你手上面嘅積木，愈來愈少……
「仆街嘞。」
十個有九個人都會有呢個反應，因為每個人性格唔同，有好多人喺呢個砌積木嘅過程入面都會好早放棄，但有啲比較堅韌嘅人，佢會不斷重覆咁砌，垂低頭深信呢個世界有真善美咁不斷砌，一直砌到佢發現手上積木已經唔足夠佢砌得太高時，呢個就係佢唔再相信世界嘅時候。
陌生人令你卻步，而熟悉嘅人更加令你崩潰。我深信最安全嘅地方係最危險呢個法規，通常殺得死你嘅，都係你最親近嘅人。
我哋嗰堆碩果僅存嘅爛積木，多數都係被身邊嘅人埋葬。聽落好似好悲傷，但其實可能我哋都埋葬過唔少身邊人嘅積木。到最後我哋發現，其實我哋討厭阿A向我所做嘅事，我可能每一日都向阿B做緊。我唔敢信你，亦都知道佢都唔敢信我。
人生就係由你信我，我又信佢。慢慢變成我懷疑佢而，到佢又懷疑吓你，最後係我唔信你哋，而你哋亦唔需要信任。人生最好玩但又最悲哀嘅，就係好似砌積木咁，用一個鐘頭砌嘅成果，用一秒就可以摧毀。
摧毀積木、摧毀關係、摧毀信心、摧毀人生。
真苦。
薛可正Facebook Page
http://www.facebook.com/sithoching