男人的Fantasy (一九九) 《男人照顧你的方法》
網上資料圖片
今日自己一個人去食米線，坐我左手邊有一對大約五十歲左右嘅男女，睇佢哋彼此之間眼裡嘅情竇數量，我估計佢哋應該係互相磨擦之中。當男人碗米線嚟到時，我斜眼望一望，心諗：
「炸醬加腩肉，識食丫，最好就係將少少炸醬放上一舊腩肉上面，再一啖放入口，加多啖豆漿，真係爽到你唔信。」
點知個人拎起筷子同湯匙，一嘢將啲炸醬整散佢，再慢慢撈到成碗都係。
「頂，你識唔識呀？」
個男人意識到我嘅不屑，只係輕輕咁問佢旁邊個女人：
「你食唔食雞翼呀？我知你唔食得太辣，啲炸醬同腩肉我撈咗落啲湯度，你應該食到。」
「我嗰碗有呀，你食啦。」女人一笑，輕輕按住男人隻左手，唔俾佢俾隻雞翼自己。跟住，個男人好似鼎爺煮餸咁，每一樣餸都向個女人介紹一次，再問佢一次食唔食。
頂你，煩到。
睇完呢個男人二十分鐘嘅演出，我可以肯定咁同你哋講，呢個男人係偽善。
無男人會鍾意俾人煩，明明係食一碗米線，你同我都一人一碗，做乜春嘢要搞到好似喺絲綢之路度做貿易咁你換俾我，我又要換俾你啫。想食啲乜嘢咪自己叫，有咩好問呀？
享受美食，除咗要碗嘢好食之外，就係要空間。男人一生人都喺度追逐緊空間，咁試問又有邊一個男人會自願喺食呢碗咁好味嘅米線時，浪費空間去問你要唔要呢樣，又問你要唔要嗰樣呀？
咪就係偽善囉。
呢啲男人，一得手就好快變返原狀，唔好信呀阿姑。
典型嘅男人照顧人方法，就係將空間平均咁分配俾大家，有冇聽過人類學家講，馬騮向人類示好會點做呀？會拎住香蕉送俾人類食呀，點解呀？因為香蕉係佢哋最愛，佢哋將香蕉送俾你食，仲唔係真係對你好呀？
男人都係一樣，男人對女人好，就係俾空間女人。任你哋喺屋企唔郁咁瞓到下晝、任你哋同女性朋友出街、任你哋無啦啦捉住自己嚟鬧、任你哋日哦夜哦。
女人唔識欣賞，以為男人唔理佢。你哋錯哂，呢個世界上邊個無脾氣，邊個唔鍾意鬧人？只不過係男人都明白世界上男女一早就唔平等，男人係點都需要讓女人，所以先唔會成日同女人鬥。
所以你哋班女人唔好再講男人唔理你，佢係俾緊空間你，記得得閒就還返啲俾佢呀。
薛可正Facebook Page
http://www.facebook.com/sithoching