男人的Fantasy (二零零) 《多多支持 多多支持》
網上資料圖片
小弟第一套電影導演作品「起底組」剛剛上映，不過呢篇文章唔係打廣告，而係想講講，謝票呢個活動帶俾我嘅事。
小弟天性係非常怕醜，近年都已經叫好少少，望住人講嘢唔會太驚。但當一諗到要謝票，我就開始會驚，人群恐慌症又開始出現。
有好多人同我講
「其實你又唔係後生，又做開生意，應該唔係一般高登仔咁怕醜吖。」
我想講其實唔係，怕醜係天生，毒係後天。後天嘅意思我覺得喺成年後，而我寫嘢出書嘅年紀係三十歲後，所以其實我嘅毒男性格一早喺成年到三十歲嗰十幾年已經養成咗，只不過好彩嘅係真係唔算太毒。
但一諗到我要企喺成班人面前，跟住同事好自然咁講句
「不如導演講句嘢先吖。」
我就肯定自己會停機，個腦即時一片空白。
不過點都好，要做嘅事就點都要做。大世界入面，永遠唔容許小性格。然後我開始我嘅謝票之旅，好好彩咁，過程入面好順利，呢度要多謝一眾陪我謝票嘅演員，一人一句講講笑，好似令我無咁緊張。
反而喺過程入面，我慢慢俾一啲觀眾分散。有啲自己一個嚟，可能外表就係大家睇嘅毒男，佢哋影相嘅對象可能永遠都係女演員，但當你見到佢嚟一次兩次三次，你慢慢就會對佢哋產生欣賞嘅感覺。
我知，大家睇到呢度都可能會話
「佢嚟影女之嘛。」
不過又咁講，真金白銀用一百蚊買張飛再等個半鐘，最後為咗影你哋幾分鐘，仲未計要花嘅時間，最擅長計數嘅香港人，有幾多個會覺得合理？呢一份唔太著數嘅支持，本來就係一種真正嘅支持。
後來有一站，我去到旺角戲院，又見到一位成日自己一個嚟嘅觀眾，謝票後佢走埋嚟，送咗一支飲品俾我
「導演，辛苦喇，請你飲嘢。」
當下嘅感覺其實都幾感動，但人多又唔可以表達出嚟，唯有笑一笑收落嚟，再講句多謝就走。
跟住後來嘅謝票，我都活躍咗少少，可能係俾呢位觀眾啟發。我哋呢個謝票，甚至係呢套電影嘅宣傳都係有限，甚至我哋嘅生活…或者係生命都係有限。我哋會遇見唔同嘅人，大家各有諗法咁擦身而過，如果我唔好好咁享受呢次過程，我諗我會覺得後悔。所以之後謝票場，我都會望實每一位嚟支持嘅朋友，好好咁多謝每一位，第一次以導演身份嘅謝票之路，先顯得完整。
首映嗰晚，我又見返請我飲嘢嘅觀眾，佢向我揮手，我立即問宣傳，有冇嘉賓無到而多出嘅戲飛。然後我送俾呢位觀眾，順便向佢講一句
「多謝你支嘢飲，請你睇戲。」
一個快樂嘅交集。
薛可正Facebook Page
http://www.facebook.com/sithoching