2018/11/16

男人的Fantasy (二零二)儲戲飛

sit photo 2018_11_16
 
我係一個入場睇戲嘅愛好者,只要有一套戲我有興趣,盡可能都會入場欣賞。
 
可能好多人會講,宜家睇戲咁方便,一套戲上完之後好快就出碟,唔似得以前咁,落畫等一排先出錄影帶,最緊要係上網睇新戲已經好快,無以前要去排隊租錄影帶又要限時限刻去還咁麻煩,係咪有必要入場睇。
 
科技發達,為咗「節省」呢兩個字,人類對生活做咗好多事,有時都會諗一諗,電影係愛好係娛樂,真係有必要節省太多令佢變質?
 
所以我都係一路保持入場睇戲嘅習慣,而且近年仲多咗一個愛好,就係儲戲飛。人年紀大就會愛念舊,以前睇戲順手就會將戲飛連埋炮谷汽水送落垃圾筒,唔知由幾時開始,我會故意將佢哋放好,再珍而重之咁搵個玻璃樽收好。
 
由開頭嘅一個月幾張,去到一年幾十張,儲嘅過程入面好淡然地進行,直到最近搬屋,我先拎返出嚟再睇一次。睇嘅過程入面我先發現,原來生活入面呢啲少少嘅一點一滴,都有佢嘅作用。我睇住每一張戲飛,拎住喺手嘅時候,都仲記得呢套戲喺邊度睇,睇嘅時候買咗咩食,甚至係睇完之後大家去咗邊度食飯。
 
呢個係一個非常好嘅「拾荒」重組,好多本來我都唔記得咗嘅事,一下子之間又番返哂嚟。我每一張一張咁睇,一路睇就一路感嘆,我哋宜家生活方便咗,科技每一日嘅使命都係想令到我哋可以喺最小嘅空間入面,包攬最多嘅事情。
 
以前同出國嘅朋友可能一個月通一次書信,宜家可能每晚都視像,見佢仲多過見阿媽;以前可能一個星期先同阿媽食一次飯,宜家可能每一日都喺WhatsApp入面用長輩圖同你傾偈。
 
空間嘅事多咗,其實就係對每一件事嘅專注都細咗。以前你有一百個朋友,可能因為時間成本嘅原因,你只能揀十個出嚟做深交;但宜家科技容許你同呢一百個朋友都每日保持最低限度嘅聯繫,但最後呢一百個人都只係泛泛之交。
 
睇返呢一堆戲飛,我開始明白,人生入面有好多事,就係你先選擇,然後再浪費。
 
你選擇好個愛好,選擇好一個對象,選擇好一段關係;然後你開始對呢個愛好、呢個對象、呢段關係去浪費時間,浪費時同佢建立,浪費時間同佢廝磨,浪費時間同佢成長。
 
最後佢哋都會還返一個回憶、一個將來又或者係一個經歷俾你,到呢個時間你先會發現所有嘅事都來得厚實來得深遠,因為以為浪費嘅時候會將所有事都記哂喺你嘅腦同生命入面,成為你一輩子都會帶喺身嘅珍藏。
 
唔好到見到戲飛時,先記得睇過一場好戲。
 
薛可正Facebook Page
http://www.facebook.com/sithoching

COMMENT