2018/11/23

男人的Fantasy (二零三)唔踩住,點讚人?

2018_11_23_sit menclub
 
網上資料圖片
 
我開始覺得,呢個世界上愈嚟愈難搵到真正嘅讚美,唔知係人類退化,定係風氣走得太前,而家我睇到眼下嘅人讚人時,都唔識我單向地讚,一定要搵其他人墊墊底,先可以成功讚另一個人一樣。
 
就好似早幾日喺Facebook,我睇到朋友分享張敬軒嘅一個MV,我覺得非常好聽,就留言
 
「軒仔唱歌真係好聽,唱功又勁。」
 
朋友好快回我,佢首先係讚好咗我嘅留言先,然後再喺我嘅留言下面回一句
 
「點都好過宜家啲所謂歌手先啦。」
我都仲未諗到點答時,佢又再喺下面回多句
 
「不過點都唔夠張學友好。」
 
喂,大佬,乾坤大挪移呀宜家?我只係想單純地讚一下軒仔唱功,你使唔使兩句之內將成件事變質,再將個重點移走?
 
我只係想讚軒仔,我無打算喺呢個課題入面踩其他人。係,有啲人唱歌係唔好聽,咁你咪唔好去聽囉;就好似我都唔靚仔,但我唔會想人哋讚金城武時,再順手加多句
 
「起碼好過薛可正條肥仔先啦。」
 
嗱咁都唔緊要,成個題目明明就係讚軒仔,點解無啦啦張學友會出咗嚟?喂首歌你POST喎,如果你覺得學友唱歌好聽過軒仔,咁點解你一開始唔SHARE學友嘅歌呀?你跣我呀宜家?出一個晚輩嘅俾我揀,跟住再出個歌神出嚟顯示你品味超脫呀?收皮啦。
 
網絡討論慢慢已經變成無趣嘅事,好多時明明係一個好有討論價值嘅題目,但總係有啲人自己想搵人踩,格硬入你哋個議題,令到成個討論氣氛都無哂。
 
「嘩,英格蘭個簡尼真係好波。」
「挑,你夠以前舒利亞勁?」
 
「喂,最近有套翠絲好睇呀。」
「點好睇咪又係唔會夠丹麥女孩好睇。」
 
「我下個月去台灣玩呀。」
「台灣邊度夠日本好玩呀?」
 
呢種惡劣嘅氣氛其實係由一啲現實世界無咩人同佢傾偈嘅人開始發放出嚟,正正係佢哋現實世界無人理,所以去到網絡世界,用張假相就周圍彈人。你可能覺得我講得好誇張,不過當你有一日再搵唔到可以同你討論嘅人,又或者呢個世界都以「賤踏」行先時,你就會好懷念,大家好純粹咁去討論同讚美一樣事係幾咁開心。
 
世界係我哋,網絡世界都一樣;真實地球有污染,網絡世界都會有。
 
薛可正Facebook Page
http://www.facebook.com/sithoching

COMMENT