2018/11/30

男人的Fantasy (二零四)建立關係恐懼症

2018-11_30_sit menclub
 
網上資料圖片
 
最近完成「起底組」嘅工作,正式多返好多時間,個人一得閒就會好多念頭,正所謂做嗰樣就厭嗰樣,好多朋友覺得我每日都瞓到黃朝白晏,一定覺得我嘅生活好寫意,其實做寫字做創作,只不過係將黑同白調轉,大家瞓覺時我工作,到我放工時你哋剛好見到我瞓覺。
 
做吓做吓,寫字呢個行頭都做咗幾年。呢幾年嘅轉變的確係大,由開一間食肆每日晚六凌二,到變咗一個創作人,工時唔同、性質唔同就連心境都唔同,以前安穩就覺得悶,宜家收入唔穩定,永遠唔知下個JOB會遇上乜嘢人就覺得攰。創作就係建立,創立團隊、創立關係先再創立作品。
 
人就係咁有趣,喺我呢個小毒男人生入面,呢一刻嘅我應該係最識面對關係,最識待人接物,但偏偏呢個時候,就係我最討厭建立關係嘅時間。喺夜深無人時,我自己都有分析過點解我會怕認識新朋友,其中一個原因可能係宜家識嘅朋友多數來自工作,職場上要識真朋友從來都係多x餘嘅諗法,講到尾都係飯碗,有起事上嚟保住你嗰個好定保住我嗰個好?
 
就係呢一份大家都覺得遲早要決一死戰嘅心態下,總係感覺好難以去親近一個新朋友/同事。
 
至於街外識嘅朋友,我成日都覺得大家有太多嘅過去,正所謂老死都幾廿年感情,我仲點可以走得入人哋生活入面,去做一個好好嘅朋友。去到呢個年紀,大家都差唔多有既定嘅關係同生活,就好似成張枱都係人,你都唔好意思坐埋去,一大堆不切實際嘅諗法,就係咁一直都徘徊住。
 
所以最近又諗緊,想重新去接觸一個行業,自己完全唔識嘅一個行業,戇居居咁走入一個新地方,任人點任人舞,要有足夠嘅恐懼同不安,証明我對呢個地方有足夠嘅新鮮感,我先會唔記得自己係邊個,無時間諗太多嘢,從新去學習對新事物嘅興趣。
 
就好似廿年前我返第一份工,乜鬼都唔識,著住對阿媽買俾我嘅布鞋,去到一個運輸公司,忐忑不安但新奇刺激嘅一刻,咁樣先會對個世界有期望,覺得做人真係有意思。
 
薛可正Facebook Page
http://www.facebook.com/sithoching

COMMENT