2018/12/07

男人的Fantasy (二零五)妳想幾時結婚?

旅行結婚地點
 
網上資料圖片
 
三十六歲嘅忊忊聽到男朋友問佢呢個問題,面上尚算表現得好輕鬆,火爆嘅佢嘗試壓住自己不明嘅怒火,向男朋友講出自己嘅「計劃」。
 
「我三十六歲喇,三十五歲已經係高齡產婦,我都過咗一年。我最遲最遲三十八歲就要生小朋友,如果唔係就算唔計我生嗰時危唔危險,我湊小朋友都要精力。
 
即係仲有兩年我就要生,三十七歲一定要陀仔。」
 
「嗯…明白。」男朋友點點頭,一直都好留心忊忊講嘅時間線。
 
「你明嗎?」忊忊問
 
「明呀,我明…無問題無問題。」
 
「咁你幾時求婚呀無問題?」忊忊無將呢一句說話講出嚟,佢吞返落肚,一貫地希望對方可以自己醒少少,俾一個足夠尊重嘅結婚過程呢一段關係。
 
就係咁,忊忊繼續安靜,繼續守候。其實忊忊都唔係一個太熱衷結婚嘅女人,只不過佢係一個中意安全感嘅女人,一紙婚書唔可以代表安全,但至少係大家對未來一個目標同方向,既然大家都決定走落去,合理地準備一個地方比趕住出世嘅小朋友,都唔係好難啫,男朋友對嗎?
 
呢次嘅商量之後,忊忊拎住男朋友一句「無問題無問題」過咗一段都幾有憧憬嘅日子,直到佢哋準備去一次長途旅行時,我喺佢上飛機時忍唔住問佢:
 
「佢會唔會今次同妳求婚?」
 
「又唔似,佢唔似有準備。」
 
「可能今次真係幾有準備,妳就好好享受呢個驚喜。」
 
忊忊最後過咗一途唔錯嘅旅程,睇佢去玩嘅相,佢笑容入面都顯示佢幾快樂,直到佢返到香港,有一晚我同佢又傾返個老問題。
 
「佢無同我求婚。」
 
「吓?我見妳啲相笑得咁開心,仲以為劇本照計劃進行咗。」
 
「我都以為係。」
 
呢一句「我都以為係」之後,其實話題就已經完咗,我同忊忊都無再討論落去,因為本來就唔係應該需要討論嘅題目。
 
你哋會唔會有諗過,辛苦一日返到屋企,時間已經係八點。你坐喺廳度等,一直等到十點都未有飯食,老婆行嚟行去,你終於忍唔住問佢:
 
「點解仲未有飯食?」
 
老婆望住你,然後答你:
 
「你要食飯你唔講嘅?」
 
你好疑惑咁望住佢問:「要講架咩?」
 
老婆走埋嚟拖住你,好有耐性咁向住你講:
 
「好嘞,無問題無問題,你唔使心急,會有得食嘅。」
 
最後你等呀等,一直都無飯食,你餓到手足無措,甚至開始懷疑人生。
 
你問我餓落去會唔會死,我會話俾妳知唔會,因為妳總有能力去延伸自己生命同呢份感情,但所有事情係唔係妳所想嘅,前路又再係唔係妳心目中一樣,呢個先係妳要唔要餓落去嘅考慮。
 
當然,一段感情雙方都會有做得唔啱嘅時候,妳大慨最錯嘅,就係當日同佢討論,同答佢「妳想幾時結婚?」呢個問題。
 
時間到了就同偕到老,
老公返到就炒餸開飯,
 
乜要問㗎咩?
 
薛可正Facebook Page
http://www.facebook.com/sithoching

COMMENT