2018/12/14

男人的Fantasy (二零六)給兒子的信

2018_12_14_sit menclub
 
網上資料圖片
 
最近陳奕迅又重新演繹咗陳詠謙兩年前嘅歌曲「給兒子的信」,仲特登將自己舊歌「單曲」嘅前奏編埋一齊,變成多年經典嘅父子對唱一樣。好多人以為「單車」呢首歌係多謝爸爸,其實當事人一早就講過係講緊年少無知嘅小朋友用嚟怪責爸爸嘅歌,而Eason翻唱呢一首「給兒子的信」,正好係用爸爸嘅角度去回應一個怪責自己嘅仔,又揪心又感動。
 
歌入面嘅爸爸無一貫父親嘅威嚴,會審視自己對兒子嘅付出,再體諒佢嘅怪責。因為我哋每一個爸爸都曾經係其他人嘅兒子,邊個年少唔係輕狂,邊個唔係總帶住一股傲氣去俯瞰全個世界?
 
爸爸嘅角色總係矛盾萬分,好多人做爸爸時仲好年輕,甚至仲喺一個會犯錯嘅年紀,但「做爸爸」呢件事又令佢急速長大,開始會望住一個啱啱出世嘅小朋友,諗好多人生當中從來無諗過嘅問題。
 
我自己都係一個爸爸,離開屋企獨居後,同阿仔見面時間少咗好多,心入面總會帶住歉意,但呢股歉意又唔係用說話可以解釋得到,只可以同自己講,第日你大個咗,就會明白爸爸邊一度做得唔好,邊一度真係難處。
 
如果要我寫一封俾兒子嘅信,我會叫佢好好享受呢個世界,唔好執著所有以為係黑白嘅事,順住人生路咁去走,記得記得,呢個世界係無絕境,只要你有心去行,人生點都會有一途小路俾你愈走愈遠,去到自己想去嘅地方。
 
我希望同兒子嘅關係永遠都好似朋友一樣,而且仲係一對非常要好嘅朋友,大家無隔膜,言無不盡,談無不歡,到佢大個之後可以同我做同一樣嘅事,最後喺我離開呢個世界之後,佢可以記得同爸爸有過呢段回憶,然後再用同一個方法,去教導我個孫,令到我哋或者讀書唔成,學唔識太多書本上嘅事,都識應付世界上嘅難關,給兒子嘅信,大概就係呢個意思。
 
流住同一血脈,係我哋呢一世人嘅緣份,世界上所有嘅關係都愈變淺薄,「長久」呢回事,愈嚟愈變得珍貴,你要記住,仔。
 
薛可正Facebook Page
http://www.facebook.com/sithoching

COMMENT