2019/01/04

男人的Fantasy (二零九)時間概念

download
 
網上資料圖片
 
喺我人生入面,已經第好多好多次講「新年快樂」,由細個望住電視倒數煙花一班人大聲倒數,到抱住個仔一路餵奶一路細聲數,剛完咗嘅元旦,我決定自己一個人喺屋企靜靜望住電視入面嘅人數。
 
我係一個時間線觀念好重嘅人,二十九歲同三十歲對我嚟講都會有好大分別,就好似過咗三十歲之後我就好少去海洋公園同落老蘭蒲,因為覺得自己已經大個,再去同班年青人爭地方玩,好似有啲唔好意思。呢個諗法比起我做咗爸爸時嘅觀念更重(我28歲做人老豆),喺我人生入面,只要我過咗條界,我就好少會做返之前一個階段嘅事。
 
到咗今年,特別有意義,因為2019年就係我40歲嘅年份,40歲喺我心目中係咩概念,諗到呢度我會諗起爸爸,諗起佢40歲時係咩模樣。我認為首先要寡言,要將生活入面想講嘅說話減少三成至一半,因為寡言嘅人永遠都俾人感覺成熟少少,畢竟都40歲,如果工作上仲俾人感覺好似細路仔咁,我認為係一個貶意嚟。
 
諗咗好耐,除咗寡言,原來我已經唔記得爸爸40歲時到底係咩樣。呢一件事曾經令我困擾咗好幾日,最後終於俾我諗到原因,爸爸後生時,都仲有同我哋講講笑,但就係去到某一個年紀,我已經好少見到佢笑。我覺得係遺傳,對時間線睇得咁死呢個觀念,應該係嚟自佢身上。
 
就係因為佢愈來愈沉默,我先發現原來喺過咗某一條時間線時,爸爸放棄咗表達。就係因為無表達,我先會對佢嘅印象會咁少,少到唔足夠我可以成日諗起同佢一齊嘅往事。
 
時間每一分每一秒都行得好殘忍,但佢掠過後,好多觀念都好模糊。
 
遺傳嘅另一種講法係重蹈,我唔想阿仔喺我有一日走咗之後,對我嘅印象都同樣嘅淺,所以過咗40歲後,除咗要成熟穩重之外,我都要好好咁學吓表達,主動咁喺其他人身上留低一啲自己嘅事,就好似我身上都有其他人留低嘅痕跡一樣。
 
我唔習慣寫新年願望,因為寫完多數都做唔到,但學識表達唔可以當成一件事,就當係往後人生入面,一樣同我伴隨嘅信條,生活每日都係一樣咁過,邊個嚟到邊個離開都唔會對邊個有太大影響,只係心入面相信嘅事,先可以令我哋每一日都覺得唔困難,覺得開心。
 
篇文係咪好長輩圖嘅感覺?係呀,到咗就嚟40歲時大家就會明點解。
 
薛可正Facebook Page
http://www.facebook.com/sithoching

COMMENT