2019/01/12

男人的Fantasy (二一零)趕海

a24d29ba809c698a45763e9e4d075ff7
 
網上資料圖片
 
做網絡人,經常睇住網絡有咩變化係必須嘅事,所以我每日都會開住好多個網頁,乜嘢都會睇睇,涉獵一下。
 
呢排喺YOUTUBE,睇到一啲「趕海」主題嘅片,郁啲就有幾十萬點擊,完全唔知係咩事,就開嚟睇睇。其實「趕海」嚟講,就係一條友拎住個夾同埋一個紅A膠筒,喺海邊行嚟行去,見到木頭又摷吓,見到啲海菜又夾吓,睇睇有冇啲魚蝦蟹嘅出沒,見到就捉返去。
 
不過呢班人係超級夠薑,幾多瘀泥嘅海邊又好,幾多海草遮住搞到完全睇唔到水底入面有乜都好,佢哋都可以一隻手唔帶手套伸入去,完全唔會淆底。呢一類嘅短片就係咁簡單,見到佢哋行嚟行去,見到石頭搬開佢,搵到獵物就大叫「發財了」,但簡單嘅娛樂本來就珍貴,佢令我諗起細個跟住鄉下啲表哥去海灘捉蟹仔,雖然我哋捉嗰啲要用顯微鏡先睇到,但呢一種快樂,對我哋呢啲七十後嚟真係好重要。
 
呢一班趕海嘅人,都有佢哋自己嘅規矩,太細嘅蟹同魚都會放生,而且一路趕海時,見到垃圾會自發執起再順手拎去垃圾站,睇到人特別開心。
 
而且佢哋每個人都有自己故事,有啲會捉俾老婆拎去街市賣,有啲就會留嚟煮俾仔女食,見一個大男人一張爛木枱一個簡單嘅火水爐,搵把唔係開蟹蓋既刀斬下劈下,掟兩片薑過下滾水又煮好一餐飯,啲小朋友又食得津津有味,生活就係可以咁簡單。
 
有時仲會有啲NPC出現,好似一個叫趕海阿峰嘅,每一次捉到蟹都會拎去街市,搵一個鴨肉檔嘅女人,好似絲綢之路咁同佢以物易物,三隻佢哋叫「打鐵佬」嘅蟹可以換幾多鴨肉。有時阿峰會送啲靚貝殼俾老闆娘,老闆娘又會搭返個鴨腎俾佢,大家眉來眼去,笑意迎迎咁,但同時又相敬如賓,眼神都唔敢邊樣正面相撞,阿峰次次都唔會帶老婆去換,男人就係衰格,幾純樸嘅都係咁。
 
當阿峰有幾日無去換鴨肉,片下面嘅留言,就會有好多人叫佢「係時間換鴨了」、「鴨肉西施呢?」等等,互動得嚟又夠搞笑,每一次都睇到好開心。
 
但都會有啲趕海嘅壞份子,例如到處破壞生態,捉到細嘅又唔放返落海,半夜又會去偷人哋放喺海嘅地籠入面嘅蝦蟹,呢啲點擊多數一般都會低,仲有好多人留意鬧到佢飛起。所以娛樂如果帶到一啲教育意義俾大家,其實都係好事,特別係好多睇片都係小朋友,好多觀念由細開始,點都係一個好事。
 
教曉佢哋環保,教曉佢哋搵食,仲可以教曉佢哋知足同簡單,人生最重要就係呢幾樣,唔好等搵唔返時先去後悔。
 
薛可正Facebook Page
http://www.facebook.com/sithoching

COMMENT