2019/01/18

男人的Fantasy (二一一)燒房菜

39123462-flame-fire-empty-hot-barbecue-charcoal-grill-with-glowing-coals-on-black-background
 
網上資料圖片
 
離開咗之前嘅燒烤店,已經差唔多有五年時間,呢幾年嘅生活雖然足夠精彩,有時諗返都會覺得,做飲食業雖然辛苦,但有佢穩定嘅地方。
 
轉行之後,去嘅地方多咗,不過見朋友同媽媽阿仔嘅機會就少咗好多,有時一個月可能要去幾個地方做嘢,返到香港又攰,寧靜喺屋企發呆算數。以前開自己嘅舖頭,定時定候都會見到身邊嘅人,就連朋友,都有一個聚腳地,生活過得好開心。
 
最後成日睇鼎爺煮飯,原來咁樣睇睇吓,都可以學到唔少處理食物同煮飯嘅技巧。一時技癢,我又會喺屋企自己燒啲海鮮食,學吓鼎爺咁喺燒元貝上面加啲陳皮,原來又真係好味好多。
 
但做人唔可以半途而廢,點都要留返啲時間出嚟寫吓嘢同拍吓嘢,我諗咗好耐,有冇得將時間分一半,將自己想做嘅嘢都完成,最後我諗到,自己可唔可以開一間「燒房菜」。
 
其實食字呢啲嘢我唔係成日用,但諗名食字係最快,亦都係令其他人最快明白。睇名都知道,叫得「燒房菜」,就係用燒烤做主題嘅私房菜,平時你地BBQ時都應該踐踏過唔少好嘅食材,燒到又乾又濃又咸又唔好味,我做燒房菜,我就係將自己咁多年嘅經驗,做到好似私房菜咁細緻,等人可以坐定定咩都唔使做,就食到好味嘅燒烤。
 
呢個做法,好處就係搵舖頭唔使咁煩,未必一定要地舖,就算係樓上舖都冇所謂,每日限定幾多圍同幾多轉,又易處理又好做。做生意點都要計蝕本嘅數先,萬一有咩山高水低,就算捱吓蝕本期,份租都無咁恐怖丫嘛。
 
諗諗吓仲可以搞埋酒飲,燒烤加酒,最好就大時大節有啲足球睇吓,咁就肯定係一個朋友嘅集中地,俾我可以玩住咁做嘅心靈寄託,因為日日喺屋企寫劇本真係好悶。
 
睇到呢度,好多人可能覺得我講笑,我係絕對講真,就當做定廣告先,如果有一日大家見到我開得成呢間舖,當俾面呢篇文又好,當我一早同你分享又好,記得多多支持。
 
如果有老闆想投資都可以隨時搵我,中門大開,新年快樂。
 
薛可正Facebook Page
http://www.facebook.com/sithoching

COMMENT