2019/01/25

男人的Fantasy (二一二)無差別愛情

2019_01_25_Sit MenClub
 
網上資料圖片
 
心儀因為一次小爭執,同男朋友阿健講分手。喺佢哋呢段食之無味嘅都市愛情入面,四年嚟嘅交往,認識五年半嘅感情,大家各有異心嘅狀態,連心儀自己都唔知,佢呢句分手嘅作用,到底存唔存在?
 
如果你問心儀會唔會同阿健結婚,佢會答你:
 
「佢都無同我求婚。」
 
咁如假設佢真係向妳求婚呢?
 
心儀猶豫咗一陣,唔敢答。佢一直都用阿健未求婚,去否定自己喺雙方會唔會結婚呢個問題入面,到底有冇盡力。
 
點解阿健唔求婚?阿健絕對愛心儀,但對唔住,現代愛情故事來去如風,「愛」呢個咁虛無嘅感覺,唔係乜嘢保值嘅財產,更加唔可以換車換樓。「愛」嗰時嫁俾你,咁如果突然間「唔愛」呢?
 
心儀帶住呢個最悲觀嘅諗法,同阿健一齊幾年,女方係最清醒,相處真係幾開心,但男人幾時變我點知?基於呢一種有少少荒謬但又唔可以否定嘅諗法,心儀喺身邊物識咗好多佢認為可以做後備嘅男人,幾時先會用到呢啲後備,心儀無概念,因為一段無前進無退後嘅愛情,大家都唔會有想改變嘅決心。
 
到底心儀點解同阿健鬧交?因為阿健去朋友屋企打機,一打就係幾個鐘,唔舒服發緊燒嘅心儀,無限放大地認為阿健唔知去咗邊度玩,可能係溝女,又可能係同一班朋友叫雞,總之就唔會係喺朋友屋企打機咁純情,你哋班男人會有咁好死?
 
而事實上亦都係真係咁好死,阿健俾心儀第二百三十八次嘅分手轟炸之後,今次佢終於都無氹返心儀,佢知道自己失蹤打機打到忘形係有唔啱,但阿健感覺到自己對呢段感情好厭倦,宜家終於都打開一個缺口,不如就用呢個機會完結咗段感情,大家都重新開始?
 
大家冷戰三日,心儀開始想搵返阿健,直到第五日,阿健終於搵心儀,因為佢瞓醒一刻突然覺得,點解要咁小朋友,幾年感情點解話分開就分開?明明大家都有共識,只不過將感情卡咗喺結婚呢個位,值得為咗一次小事就分開咩?
 
振振有詞,我哋多數情侶,一齊時就係「世界將我包圍」,分開時就係振振有詞。好快佢哋又冇事,好快又走返入到底結唔結婚呢個樽頸,心儀依舊有同佢幾個後備聯絡,阿健間歇性知道心儀有同其他男人見面,覺得佢唔會想嫁俾自己。
 
愛情路上,
心儀不懂阿健,
阿健唔認識心儀。
 
而事實上,
係阿健唔知自己需要乜嘢伴侶,
心儀估錯阿健嘅想法。
 
呢啲就係現代愛情,選擇太大,差別太大,糾纏一生。
 
薛可正Facebook Page
http://www.facebook.com/sithoching

COMMENT