男人的Fantasy (二一三)香港漫畫的浪漫
網上資料圖片
十八歲嘅一年，先擁有自己嘅第一部電腦，開始我網上haters嘅行為，開始我日日上網搵人鬧交嘅習慣，我嘅打字速度喺呢段時間練返嚟，行文嘅流暢度，亦都係喺同人對鬧時嗰短短彈指之間慢慢累積。
十八歲前，我有兩個嗜好同興趣，就係踢波同睇公仔書。踢波講過好多次，呢次想講吓公仔書。我係龍虎門白蓮教時期入伍嘅港漫迷，沉迷程度係會日日拎住本公仔書照住嚟畫，而且睇完一次又一次。嗰個年代係香港嘅黃金年代，亦都係香港漫畫界嘅輝煌盛世。
我小學時代，拎公仔書返學校同人分享，俾老師捉到嘅次數都多到唔記得，但我仍然會帶，因為香港漫畫嘅打鬥係有佢嘅獨特，唔合乎情理，但又好啱小朋友嘅幻想世界，我仲好記得同小學同學賴治同肥歐，喺一個小息入面不停研究，到底黃小虎嘅「電光毒龍鑽」係點樣做到，直到宜家，我耐唔耐都會同呢兩位老同學講返呢件事。
以前，每個星期等心儀嘅漫畫出版，係一件好期待嘅事。一買到新書，我多數都係睇三次，第一次會好快咁睇哂所有圖畫，第二次會好快睇哂佢內文嘅文字，第三次先會一次過圖文一齊睇，呢個睇法其實戇居，係就係想延續自己拎住本書喺手嘅時間，一路保持住新鮮感。
當年好賣嘅港漫，每個星期可以賣十萬八萬本，當紅嘅主筆個個身光頸靚，睇佢哋生活專欄，會好似朋友咁知道佢哋嘅日常生活，有好接近嘅感覺。
但所以，都因為電腦出現，港漫式微而改變。
我已經有好多年都無買港漫，亦都慢慢唔記得咗每個星期等港漫出嘅感覺。但最近有一本關於三國題材嘅漫畫，令我每個星期又開始過返等漫畫出嘅日子，重拾返呢一種樂趣。
其實呢一種小樂趣，係我哋生活上俯拾皆是嘅小事兒，只係我哋追求嘅目標愈嚟愈多，愈嚟愈大，好容易忘記咗，最開初令我哋人生獲得樂趣嘅，到底係乜嘢。
薛可正Facebook Page
http://www.facebook.com/sithoching