男人的Fantasy (二一四) 情人折
網上資料圖片
阿強打算，過埋個情人節，就會同秋慧分手。佢哋一齊三年，步伐尚算一致，有結婚意識但大家冇結婚方向，大概就係如無意外我會嫁你你亦會娶我，但幾時簽紙就好似有啲遙不可及。
加上秋慧開始難湊，成日都要阿強估中佢諗咩，一諗唔到秋慧想食乜晚餐，阿強就會得到一句：「你一啲都唔留意我。」
拍拖開頭，阿強就當然應付到，但時間耐咗，連阿強都覺得辛苦，曾經有一段時間，佢哋兩個都處於「你又憎我我又唔想見到你」嘅狀態，大家都係等一個了斷原因，去結束一段睇落好辛苦嘅感情。
最後俾阿強搵到原因，原來「過埋個情人節」都係一個分手原因。
因為阿強覺得，情人節應該大家開開心心，因為被市場氣氛帶動，所以嗰日大家都特別好心情，秋慧期待阿強嘅準備，阿強又知道秋慧對呢次嘅約會有幾大寄望，做事就份外落力。
佢哋先去睇咗一場「新喜劇之王」，睇戲途中，秋慧睇睇吓主動咁攬住阿強，因為佢記得，三年前佢同阿強就係睇完同樣都係周星馳賀歲電影「美人魚」而一齊。整個氣氛就好似返到三年前一樣，阿強亦感受到秋慧嘅感覺，主動咁錫咗秋慧一啖。
呢一個接吻係佢哋三個月來嘅一吻，係破冰嘅一吻。
然後佢哋拖住手去食飯，秋慧一直都好滿足今晚嘅一切，但阿強心入面一路好忐忑，到底自己幾時先同秋慧講分手？
時間一分一秒咁過，回家途中，兩個人開始無傾偈，阿強心諗呢次死嘞，情人節藥力開始散，雞蛋挑骨頭嘅秋慧開始歸位，正當阿強一路行一路驚，去到秋慧屋企門前，秋慧終於同阿強講起嘢上嚟嘞：
「對唔住」
吓？阿強心諗妳唔係有嘢想怪我咩？
「好多謝你今晚嘅安排，我覺得你好重視我，可唔可以一直都係咁？」
阿強無講嘢，即時和情人深深一吻來代替講話，一晚嘅情人節有驚無險咁陪住佢哋嘅感情又走過。
其實好多人好似阿強同秋慧一樣，年月流逝就忘記初衷，未曾努力就想搵個原因放棄，其實眼前唔可以解決嘅事，只要大家行前一步，好多事就已可以解決。
薛可正Facebook Page
http://www.facebook.com/sithoching