男人的Fantasy (二一五) 阿強嫁女
網上資料圖片
我老友阿強今年四十三歲，佢大我四年，不過比我早成十年做老豆，個女思慧今年二十四歲。由細到大阿強都好錫個女，供書教學管接管送，對個女無微不至，不過對個女嘅阿媽，即係佢老婆呢，就真係非常之一般。
我成日都同佢講：「對個老婆好啲啦，阿嫂又賢淑又溫柔，一陣無咗你就知死。」阿強唔聽我講，對老婆永遠都係呼呼喝喝。
思慧二十四歲女，終於都要嫁人，喺擺酒嗰晚，阿強不知幾開心，拎住支威力忌全世界咁走，見人就乾杯，拉都拉唔到。仲未到個瑤柱髮菜上枱，佢已經好似差唔多瞓低咁，我忍唔住行埋去，叫佢慢慢飲。
誰不知阿強攬住我，喺我耳邊第一句就話：「我真係好唔捨得個女。」
我見佢最初面紅，慢慢仲好似雙眼通紅咁，建議佢陪我再陪佢出去食一支煙。就係咁，兩個麻甩佬就行咗出去抒解一吓阿強對個女嘅離愁別緒。
阿強點起一支煙，慢慢咁講：「思慧出世嗰日，你記唔記得？」
「記得，我得十六七歲，踢踢吓波你話做老豆就衝咗去醫院，搞到我哋唔夠人跟隊。」
「哈哈……係呀，第一次喺醫院見到佢，不知幾得意，估唔到眨眼就咁大個。」
「做咩呀？驚個女婿對佢唔好？」
阿強望望我，又繼續講：「細個諗住俾佢讀名校，識個有錢仔，唔使學佢老母咁嫁個貨車佬丫嘛。佢個老公一家四口做個300呎糖水舖，我阿思慧平時碗都唔使洗一隻，嫁咗佢都唔知要唔要落去幫手掃地。」
「嫁雞隨雞都唔驚得咁多…咁你又俾佢嫁？」
「咁個衰仔係對佢幾好嘅…臨結婚前我暗中跟過佢幾次，平時收工唔係打藍球就係返屋企，起碼唔會出去玩先。」
「女人嫁老公，最緊要對佢好。」
「咁又係呀…」阿強吸一啖煙，又開始望住個天思考。
「係呀，唔好學佢阿媽咁…個老公望都唔望吓自己……」我一路講，一路眼尾望住阿強，阿強動作停低，一路聽我講。
「今晚返到屋企，思慧就唔會喺房度等你幫佢冚被。雖然你同阿嫂都後生，不過話哂都跟咗你成廿年，同你終老嘅點都係呢個老婆，有時你唔會諗吓阿嫂為你同個屋企付出幾多咩？」
「嗯……」
「思慧係你個女，就要矜貴。阿嫂都係人哋個女啦，仲要係你老婆，兄弟，係時間諗吓自己嘅生活係由乜嘢組成。」
我講完，阿強支煙都食哂，我見阿強兩行眼淚最終都收返入去，就同佢高高興興咁返入酒席內。當晚好開心，阿強最後都係醉咗，好多兄弟都祝佢做外父，大家高高興興咁飲咗一場。而最開心嘅，係阿強最後離開酒樓，就算幾醉行得幾唔穩，隻手都係拖住佢老婆，亦係都係人哋個女，最完美嘅一日。
薛可正Facebook Page
http://www.facebook.com/sithoching