男人的Fantasy (二一六) 認命
網上資料圖片
廁所工人喺廁所入面食飯，被一個如廁後嘅市民見到，然後市民佢慈悲心大發，拍低廁所工人食飯時嘅可憐樣(當事人認為)，再放上嚟悲鳴，大問點解個世界咁唔公平，要一個競競業業嘅老工人，連一個食飯嘅地方都無。
張相一出到公海，留言者眾，好多人都同情老工人，有啲甚至致敬起上嚟。然後又有議員用此事做磨心，順便帶入會議連同用幾億公帑去起幾多個公廁一齊討論，會議上振振有詞，聽起上嚟有理有節。
同一時間，有人走訪廁所老工人，老工人睇到相後表示無盡空虛，自己只係想勤勤力力打份工唔使拎政府錢，喺廁所入面食飯，自覺方便而且無問題，如果要逼佢去遠啲嘅地方食，佢寧願唔做呢份工。
香港好多人都成日大叫要自由，要空間，但總係未有發現，「空間」呢一樣嘢，喺一個公眾社會入面係相對。你喺坐巴士時想要空間聽吓歌，會識得帶耳機，唔好騷擾到其他人；你喺街上面想自由咁食支煙，會走到去吸煙區度吞雲吐霧，但點解當你想彰顯自己嘅同情心時，唔考慮一吓老工人嘅感受？
香港嘅「同情」已經泛濫到非常廉價，一個平台一個私人戶口，再加上一個轉載，你就鍾意講到幾偉大就可以有幾偉大。呢種論述出發點永遠都係好，但入面嘅論點永遠都好似烏托邦入面先可以有一樣，點解似烏托邦，因為現實中係一定唔會搵到。
最後風風火火搞咗好幾日，我每日都見到有人拎住老廁所工人張相講完又講，消耗到七七八八之後，好快又有一單新嘅事出現，所有人嘅同情心又會轉去其他地方，呢一點我都明白，畢竟每個人嘅時間同埋同情心都係有限。
時間返到去市民影工人食飯嘅一刻，嗰一秒鐘到底佢係用乜嘢心態去影呢一張相？
我認為世界以真善美作首要選擇，我相信佢都係好心，但一個好心按下一張相之後，折磨咗老廁所工人又折騰咗大家打上百萬字討論之後，老廁所工人得到嘅，只係一場虛驚，同埋佢真係俾人影住佢喺廁所入面食飯。
生活係磨人，生活上大家如果有得選擇，當然係日日落富臨門食飯。但萬一你無得選擇，或者係選擇唔多，你都總可以調整一下心態，為生活作出妥協。呢一種為生活係大部份嘅低下階層都會選擇，過程苦樂參半，唔可以叫睇唔起自己，但唔一定會鍾意外人睇到自己嘅妥協，呢一種都係一個生活上，甚至係生命上嘅空間。
佢哋都唔需要過量嘅慈悲同愛心，反正香港應該無咩人會去完公廁之後拍一拍廁所工人個膊頭，友善地講一句多謝。
不如，俾啲空間大家。
薛可正Facebook Page
http://www.facebook.com/sithoching