男人的Fantasy (二一七)網絡禮貌
網上資料圖片
網絡之大，功用之多，除咗令到大家喺工作同消閒時方便同快捷咗好多，仲令大家好容易就識到朋友。十幾年前，成日都會有人話「網友」係唔可靠，因為你唔知佢乜頭乜路，但去到今時今日，我認為已經無網友唔網友之分。
唔計其他交友平台，一個Facebook啟用十年間，已經令我哋多咗好多朋友，你見過佢嘅、Like過佢嘅仲有知道佢返咩工嘅，無1000點都有900，就好似我之前所講，喺呢個世代都無話係唔係網友之分，有時遇到投契嘅，不分男女都會當成真正朋友咁，可能係交流嘅地方無咁親密，但唔少都可以發展成唔錯嘅朋友。
但有時熟還熟，網絡友誼係點都要俾少少網絡禮貌？
現代人喺平台分享自己嘅瑣碎事已經係習慣，有時我哋做咗一樣值得開心嘅事，影張相，留一兩行字，刷吓存在感之餘，當記錄一吓自己嘅生活。但好多時，都會有好多唔太有網絡禮貌嗁朋友令你好洩氣…
阿強星期日同女朋友慶祝周年晚餐，放咗一張牛扒相上去Facebook，喺佢未得到祝福之前，第一個留言已經令佢好無癮：
「唔好食太多牛，紅肉多毒素，其實宜家好多素食餐廳都有啲慶祝套餐，又健康又開心」
阿強個女朋友小美一睇到，即時問阿強：「喂，你啲朋友咩料呀？好熟㗎？」
阿強都唔知點答，留言嘅人叫張文樂，係阿強喺籃球群組識返嚟，知道佢係一個老師，四十幾歲左右啦，講起藍球時有板有眼，勢唔估無啦啦喺阿強周年晚餐張相上面會講句咁嘅辣著小美。
「即係網友啦，unfd咗佢啦無啲禮貌，健康健康，我哋健唔健康係咪要用一張相証明呀？人哋個post係開心係都要搞到人唔開心。」
「unfd又唔係幾…佢平時同我講籃球時都幾開心。」
「唉，是但你。」
小美無癮，轉身就行咗入房。阿強仲無癮，啱啱先食完餐3000幾蚊嘅飯返到屋企，到底我做錯咩？
又有一次，阿強同小美嘅新屋裝修得七七八八，阿強將小美整得好辛苦嘅相架組合放上網，只見幾十個小相架砌成一個大心心，入面全部都係佢同阿強嘅相，好不甜蜜，好不甜蜜呀。
誰不知……
張文樂：「大陸淘寶貨？小心爆呀。」
結果當然又係俾日日都睇住Facebook睇吓有幾多人會like佢哋嘅小美睇到，第一時間又係大發雷霆：
「喂，佢又點呀？煩唔煩呀？」
阿強無奈，再睇一睇阿張文樂個Facebook，先發覺佢原來兩個月前失戀，日日喺Facebook寫千字文，感慨愛情嘅短暫，自己人生路上嘅不如意，字裡行間都略見激動，好似慢慢唔相信愛情之餘仲唔係太想其他人都愛情順意，反正就係佢失戀時成個世界嘅女人都不是好東西。
阿強無奈，只好unfd呢個藍球朋友，畢竟每個人生活都大壓力，你哋以為無事嘅一句，隨時都帶俾其他人好多壓力。有時你哋認為自己意見精闢，都要留意返時間地點人物，唔係諗到就講，個世界唔係得你一個。
做個有網絡禮貌嘅網絡朋友，基本尊重，無需爭拗。
薛可正Facebook Page
http://www.facebook.com/sithoching