男人的Fantasy (二一八)養一晚寵物
網上資料圖片
獨居接近半年，生活上改變好多，自己嘅心態亦都係。以前事事靠人，宜家反而想遠離人群，鍾意一個人半夜寫嘢，鍾意唔出街，自己見到乜就煮乜，起碼瞓前一刻，我數得出自己一日入面做過啲咩。
每一日喺Social Media已經要面對好多人，所以現實世界入面，我選擇咗平靜，有時甚至會係，死靜。
我好悶嘅時候，會去對面屋同婆婆傾偈，佢係一個獨居婆婆，每日都會有社工拎飯俾佢食，社工派飯時間，就係我起身嘅時間，因為婆婆耳仔撞聾，社工要好大聲拍門，佢先聽到。
不過婆婆有老人痴呆，有時星期一同佢傾完十分鐘，星期二朝早佢就會唔認得我，用望住個賊一樣嘅眼神，望住企喺佢面前態度友善嘅我。
幾日前，我返屋企時，見到婆婆一個人企喺門口。今日佢無帶假牙，好似啲人話「妹吓妹吓」咁望住我，我唔知婆婆認唔認得我，我向佢做咗個眼神，然後問佢做咩仲唔入返屋，大風呀婆婆。
佢指一指後樓梯，講咗一隻字：「貓」，然後就行咗返入屋。
我半信半疑咁行去後樓梯，點知真係有一隻貓仔喺度，我走埋去篤吓佢個頭，佢又鬼死咁純品同我玩，仲喵得陰聲細氣。呢個時侯一度陰風吹過嚟，放心呢個唔會係鬼故，只係嗰晚真係有多少凍。我感覺到隻貓仔個身震過貓王咁，唯有抱起佢拎入屋先。
返到入屋，我都唔知點處理，時間又已經唔早，但我屋企除咗公仔面之外，都無咩俾佢食。我走落便利店，買咗兩盒奶返屋企，睇到呢度嘅貓奴一定想講咁飲會屙，呢一樣我都知，但屋企真係無嘢俾佢食，所以買定兩盒奶以備不時之需咁解，請大家好好放低。
買完返去，見到佢好乖咁瞓喺我個T恤加新睡拖加紙盒砌出嚟嘅貓竇入面，我去開咗盒奶然後放到室溫，跟住放喺佢個竇隔離俾佢。呢隻白貓仔又幾過癮，由我一點放到三點，佢都一直瞓覺完全無反應，好似玩咗幾晚通宵咁一直瞓，直到三點起身，佢自己走埋嚟我腳邊同我玩，當時寫緊劇本嘅我都唔知點算。
最後我都係選擇同佢玩，因為我怕佢肚餓，所以一直帶住佢喺佢兜奶附近位置玩，諗住佢想飲嘅時候就可以飲，但最後佢都係掂都無掂過。
玩到攰(我攰)時，我就瞓咗喺梳化，合埋眼伸隻手喺地下同佢打交，唔知點解，一路合埋眼一路咁樣玩，有一刻又覺得，如果養返隻貓其實都幾好，就係咁樣玩玩吓，我就瞓著咗。
直到我突然聽到拍門聲，成個人先嚇到彈起，一打開眼第一件事就搵隻貓，因為我醒起露台門好似未閂好，但到我一企起身，就望到佢已經一早返咗佢個位度瞓，望落去仲瞓得仲舒服過我。
我行去開門，一個我唔識嘅女人。
「唔好意思，請問你尋晚係咪執到隻貓仔？」
「係呀。」
「係呀唔好意思，隻貓係我放喺婆婆度一晚，我返嚟見唔到貓仔，問婆婆佢話你拎咗佢隻貓。」
「吓？」
「不過都唔緊要啦，你照顧住仲好，佢有冇周圍屙？」
咦係喎，點解我成晚只係諗到隻貓食，但諗唔到佢要屙呢個問題呢？
「哦哦……無，佢好乖。」
「係呀，佢好乖架。」
就係咁，我就將貓仔送返俾佢呢個中女主人，我抱住佢過返主人手時，仲感覺到佢肚仔有瞓咗一晚嘅溫暖，個心覺得好開心，都總算做咗一件事好丫。
中女主人抱佢走，我一路望住佢哋，最後都係忍唔住問：
「係呢，佢叫咩名呀？」
中女主人以為我問佢：「我？我叫Joan…」
「唔好意思，我係問貓仔叫咩名？」
「哦哦……哈哈，佢叫阿威。」
「阿威，威武個威？咁男人嘅個名。」
「唔係呀，係write，白色嗰個write。」
「好，再見喇阿威。」
多謝你陪咗我一晚，雖然我閂門之後先發現原來你喺鞋櫃屙咗一篤尿。
薛可正Facebook Page
http://www.facebook.com/sithoching