男人的Fantasy (二一九)《三百呎公屋，四十呎電話線。》
網上資料圖片
拖住有線嘅嘢可以好似無線咁周圍走，應該係呢一代九十後又或者係千禧後唔會再遇上嘅事，今日經過旺角遇上呢款電話，令我諗返好多拖住電話線過日子嘅回憶。
細個住公屋，一般嘅玩意都係戶外活動，踢波游水落樓下玩幫捉放膠袋，但一返到屋企，只係得返畫公仔一樣。由細我已經唔鐘意睇電視，加上阿媽又一日到黑播住果套劉三姐，所以我多數都係自己一個人拎住本龍虎門照住畫。
升到中學，我搵到人生趣味 – 傾電話。
嗰個年代當然一般學生如我係冇手提，屋企電話就成為我放學同假期去同同學吹水嘅途徑，每日除咗食飯睡覺，最低消費要傾三至四個鐘頭電話，最耐果次，係三個人由夜晚八點傾到朝早八點。
起初我屋企係用撥號式電話，即係要用隻手指插入去你想打果個號碼，打完之後仲要等佢返原位先可以再打第二個號碼嗰種，嗰種電話，又慢又重，電話線短就唔在講，根本冇可能可以遷就到我一路瞓喺床上面一路傾電話嘅習慣，所以有一次當呢個老爺電話壞咗之後，我自己斥資咗四十蚊買嘅一款電話。
原因？好簡單，因為呢種用膠做嘅電話好輕，基本上我可以一路拎住佢一路周圍行，再加上呢一種電話係可以自己買電話線駁長，我試過最長用四十呎電話線去配合我間屋三百幾呎嘅範圍，令我拎住個有線電話都可以好似當無線電話咁用，充分咁貫徹咗我國偉大武術家李小龍先生所提倡嘅「以有線為無線」嘅哲學。
就係咁，我中學生涯就由呢部電話陪我渡過，有時係同一個女仔傾，又或者係同兩個甚至係更多嘅女仔傾，因為哲學家尼采同我國明朝名將袁祟煥都講過「功欲善其事，必先利其器」呢個硬道理，所以除咗一條特長電話線之外，一個3line轉駁都係我哋電話腳中受歡迎人物必備嘅工具。
3line者，其實我唔知正確係點叫，簡單講就係我可以同A傾緊果時打埋俾B，然後用熟練手法將個收線制按半秒之後縮手，咁B就可以加入我同A本來嘅電話會議架喇。
我人生入面最自豪嘅事就係擁有一團為數八個都有3line嘅電話兵團，最高紀錄係九個人一齊傾電話。
九個人，根本就唔係傾電話，係考驗我哋EQ嘅時間，因為喺電話入面你只會聽到兩句說話：
「喂你唔好撚嘈住先啦，我要講嘢呀。」
「你係邊個？頭先講嘢果個係邊個？」
但我哋依然快樂，呢個電話，就好似我哋一班人嘅小基地，我哋獨有嘅小天地，唔會有人可以打擾到我哋嘅聯繫。
但講明係好似，即係話呢個小天地根本係唔屬於我哋，因為每次當我睇到老豆講電話，我都好似熱鍋上嘅螞蟻一樣，只要我聽到我老豆講電話嗰時：
「喂，老黃呀？係呀。頭先場馬你…喂老黃你等等，我有線入….喂？薛可正唔得閒你一陣再打嚟…」
喂？我邊度有唔得閒？乜你見唔到我企咗喺你隔離好似阿婆輪街症咁一路用渴求嘅眼神望住你咩？
如是者，因為中學生係冇耐性呢個定律，我嘅3line團會用極高頻率嘅次數不斷打嚟我屋企救我直到我可以拎起個電話同佢哋報平安為止，但我老豆亦同時係一個好頑強嘅長輩，單單係講跑馬呢個話題佢都可以同人傾一個鐘以上。
一個鐘？係一個鐘呀，呢一個鐘入面我到底miss左幾多嘢？3line兵團入面今日到底有幾多個人？有冇新成員？有冇新話題…？所有所有都係我呢隻小螞蟻想知嘅問題，但可惜面前呢位不斷講告東尼今日騎得好差嘅男人，將我狠狠咁擋喺呢度電話大門之前…….
二十幾年後，今日偶爾諗返呢堆往事，令我有新領會，當年將我擋喺大門前嘅爸爸都已經仙遊十幾年，呢個年頭每個人都有一部自己嘅手提電話，再配以WhatsApp微訊呢類道具，要搵一個人已經無難度可言，
但正正係咁，我哋都好似唔會珍惜，我哋搵到一個人嗰份喜悅同感恩。太容易解決到同得到嘅人同事，的確係搵唔到珍惜嘅動力。
如果你經歷過冇手提冇call機，約錯地方見唔到朋友要死死地氣返屋企呢種事，你應該知我講緊乜嘢。
我，懷念所有。
薛可正Facebook Page
http://www.facebook.com/sithoching