男人的Fantasy (二二一)三十五歲後遇到的女人
網上資料圖片
女人對男人一生嚟講，係啲乜嘢？
細個嘅時候好簡單，如果見到一個靚嘅女同學，喺未識對異性有咩反應時，個腦已經會俾啲成日諗起對方嘅反應你。
我哋嗰時，叫呢啲做「中意」。
鑑於我哋對樣衰嘅女同學係唔會有反應，而呢個年紀我哋同女同學大多數都係無故咁處於對立。所以，一個令你有「中意」感覺嘅女仔，曾經係你世界裡面唯一嘅異性。
而呢個影響，對男人嚟講，我夠膽講係極大嘅。
後來我哋慢慢成長，我哋會開始搵女仔做吓朋友，但呢啲女仔多數都係「唔會溝」嘅女仔，又或者係你想溝嗰個女仔嘅閨密，再慘啲就係溝唔到之後焗住要半兵半朋友咁運作嘅友情。
所以喺我哋男人嘅前半生，女人只有兩個可能性，
「溝」，同埋「唔會溝」。
直到我哋「溝到」，跟住到我哋結婚，我哋對女人嘅關係開始有變化。因為有老婆嘅原因，我哋已經唔可以再將老婆或者女朋友以外，而你又有興趣嘅女人直接撥入「溝」嘅列隊中，因為喺呢個道德社會入面係唔容許，私人嗰啲「無人之境」不在此列。
再去到我哋出嚟工作，然後我哋會開始認識到一啲叻嘅女人，一啲比你能力高，比你聰明比你有遠見嘅女人。
喂，女人唔係剩係得溝同唔溝咋咩？
呢啲情況，多數都會出現喺35歲之後，因為當你努力爬緊上去時，你會發現有個女人比你爬得更快；當你啱啱買咗架二手寶馬出去威時，你發現一個細你十年但揸住架Macan嘅半少女體，出現喺你生命入面。你會開始諗，原來女人可以用嚟欣賞、交流甚至係學習。
當一件本來以為黑白得唔可以再黑白嘅事入面，你搵到一啲彩色嘅部份，當中嘅好奇心，係足夠令你生活入面每一日都覺得有趣。
以前遇到靚嘅女人，去溝啦，等咩呀？
但宜家呢個女人係你上司喎，
佢住半山，拎住個Hermes係你兩份Bonus都應該唔夠找數嘅價錢，
但當你覺得「點溝呀？」嘅時候，你發現佢有趣。
有趣嘅係佢雖然把口幾粗口，但叫得上係知書識禮。
佢嘅粗口因為同你熟稔先會出現，係一份信任。
你哋會互相關心吓，但真係朋友嘅關心，唔好諗太多，
你哋結伴覺得好過癮，但大家都唔會有愛情嘅感覺。
如果十年前，呢個男人一定會將呢份感覺強硬地轉去愛情，
因為唔知天高地厚嘅年代，
仲未知道一段感情入面，到底稱身係有幾重要。
十年之後，呢個人可能嚟得剛剛好，
因為我哋人生已經拚搏到無咩自己空間，
所以佢可以喺你打擊到無得再打擊嘅人生入面，
幫你喺少得唔可以再少嘅空間之中，
偶爾俾一粒糖你，令你覺得原來生存都幾有趣。
唔好破壞，感情就會常在。
仲捱到去呢度嘅你，係咪覺得好難明？
定係一路睇，一路諗起身邊某一個人？
諗起大家相遇嘅情景，當中嘅感覺？
寫咗成千字，只想帶一個簡單嘅道理俾大家知：
唔好見女索就想溝，有層次嘅女人係值得你放低對淫眼去欣賞，
亂入一段感情，永遠只會令你錯過一段可能值得經營嘅友情，
醒唔醒目呀？
薛可正Facebook Page
http://www.facebook.com/sithoching
IG：sithoching