男人的Fantasy (二二二)不文才情
圖片來源：明報
我喜歡黃霑，從小就喜歡佢嘅表達手法，第一次覺得好睇，應該係無線幫佢入行三十周年舉辦嘅「霑霑自喜三十年」。霑叔一張床，上面坐住幾個當時得令嘅當家女星，係派頭亦係地位，嗰時年紀細細，開始覺得做人原來唔靚仔都好似唔太緊要。
平時又睇返爸爸錄起嘅亞視節目「今夜不設防」，我最中意睇哥哥同成龍嗰三集〈成龍上過兩次、哥哥一次〉，四個大男人食煙飲酒，嗰個年頭無咁多世俗眼光，亦無太多道德高地子民，所以事都好純粹，睇得好開心。霑叔係三位主持入面最多工作嘅一位，因為倪老唔識主持，佢個位置唔係上位亦唔係下把，反正就係亂衝亂撞，有時硬入得恰到好處，有時會打斷嘉賓，蔡瀾先生一向閒雲野鶴，只要霑叔會修正控制嘅事，佢一向都好少主動出手，除了林燕妮上去嗰一集。
林燕妮同霑叔嘅故事，我認為係最好嘅愛情故事，互相欣賞到老，亦都懷念到老，失去咗嘅感情永遠都係歷久常新，一講起就會酸溜溜嘅回憶係最佔腦容量。當年林小姐上節目嘅一集，霑叔開場時已經半醉，蔡生知道當時二人一齊嘅身份問題，全集主導整個節目，霑叔直情飲酒算數。
酒過未到三巡，兩杯落肚霑叔已經帶醉，鏡頭前面，兩個人眉來眼去，當時大家已一齊十幾年，亦都係分手前嘅一兩年，帶怨氣嘅說話，有火花嘅爭辯，兩個人半帶真性情嘅表現，霑叔用行動話俾你知，幾學富五車嘅才子，喺愛人同鏡頭前面，都唔會介意好似一個小朋友咁撒野，只要妳覺得我愛妳就好。
後來霑叔戀上女助手，後來同林小姐分手，又後來霑叔因病離開，十幾年後林小姐亦都撒手人寰，因為資訊發達，我哋都可以喺互聯網上睇返佢哋嘅舊事，回顧佢哋愛也瘋狂死也懷念嘅一段感情，當中有住人類最劣根性嘅所有事，我感覺到呢段先係一段真感情。
無論我哋相處得幾差，到死嗰一刻我哋都係纏繞住，所有人口中黃霑身邊最恰當嘅女伴，永遠都係最儀態萬千嘅林燕妮。愛情無原因，亦都無公平，係天生命中註定。
霑叔人生最錯嘅事僅僅於感情上發生，而喺創作上佢絕對係香港其中一個大師，佢填嘅歌詞無時間性，講嘅係人生尋常百態，巧妙難述如「難為正邪定分界」又或者係千帆盡過看透世事嘅「滄愛一聲笑」，只要你有經歷，而你又細味過當中意思，你都會珍而重之地將呢啲硬道理好好收喺心入面，就好似一位老師向你叮嚀嘅世間百科，喺你迷途時學以致用。
霑叔有一句說話我特別同意，「粗口講得好，就係一種藝術」，粗口要講得好，本身都係好難，因為呢種文化前提已不被認可，覺得係低三下四嘅表現，所以有前設嘅情況下，對面明明俾你用粗口X，都可以覺得心悅誠服，咁呢樣又的的確確係一門藝術。
眨眨眼霑叔又離開十五年，我相信唔會再有，亦唔需要再有。唯有喺網絡上多多回味，將光輝時代嘅偉大人物，用心尊敬落去。
薛可正Facebook Page
http://www.facebook.com/sithoching
IG：sithoching