男人的Fantasy (二二三)誰不打一槍？
圖片來源：明報
先講明，我都係一個曾經喺感情入面有異心嘅男人。而且由91年開始聽許志安嘅歌開始，到近幾年嘅作品都有聽，如果一定要用二元對立嘅角度去評論許志安，我呢一刻依然係好感大於其他。
但我唔反對其他人喺呢一件事上面對佢嘅討厭，因為直接嘅討厭係最真實。呢個世界好多人心入面都有童話，而呢類事件，打破好多人心目中嘅童話。
雖然我唔知道點解有啲凡人要被逼成為其他人心目中嘅童話，但群眾嘅道德牆係原子彈，呢個已經係不爭嘅事實。
由朝早十二點起身見到呢單新聞，我表示錯愕。直到下午草草睇過條片後，我繼續工作，然後七點鐘嘅記者會，同朋友喺群組有討論，最後都係返去自己嘅生活。
我有一刻喺度諗，我需唔需要跟隨所有人嘅感覺，將呢件事變成我呢一晚嘅生活，去同仇敵愾，去劫富濟貧？呢件事上面咁多羅賓漢，但真係需要咁多正義嘅聲音嗎？
然後我見到大量對兩位直接當時人嘅改圖改歌恥笑，我認為係正常，就當係承擔。不過大眾玩得高興，開始見到兩位受害人嘅改圖，四位當時人關係圖嘅插科打諢、大眾覺得精闢嘅舊片仲有大量嘅嬉笑聲。
我哋香港人成日講不公，每日都要到處搵公義去伸張。但當一啲唔太關自己事，而又可以彰顯道德嘅機會一出現時，又會不惜一切咁去發酵放大。一單愛情悲劇去到今日只係區區三日，大家已經分唔清楚邊個真正受害。一班人當事主們馬騮咁玩，打住道德嘅旗號去為所欲為。
當全世界都向佢哋開槍時，有邊個忍得住手唔去開心過癮食吓花生。
子華好多年前已經講「魚旦仆街論」，佢講嘅對象正正就係我哋香港人。呢個並唔係責罵亦都唔係怪罪，而係我哋嘅社會風氣一路演變到咁，最後呢種情緒上嘅洪水猛獸，最後都只會嚟叩返我哋自己度門。
香港好多人都中意睇子華，但子華多年嚟嘅勸勉，有啲人唔明，又有啲人唔聽。佢最後一個楝篤笑嘅「放生陳冠希」，有好多人都唔認為係一回事，一代神話離開之，想陳述嘅都仲係我哋香港宜家發生緊，而又最根深柢固嘅問題。
只要喺暗角，唔需要負責嘅情況下，邊一個都樂意打一個素未謀面嘅人一槍。
呢個係人性，定係真理？
薛可正Facebook Page
http://www.facebook.com/sithoching
IG：sithoching