2019/04/26

男人的Fantasy (二二四)狼人殺

download-1
 
網上資料圖片
 
連我自己都唔知道,點解會無端端中意玩狼人殺。
 
幾個星期前百無聊賴,收到表弟傳嚟嘅一段台灣綜藝短片,入面係小豬主持嘅「狼人殺」節目單元。睇完一集,又搵多一集,就係咁睇吓睇吓我就睇咗三個通宵。
 
我知道呢個遊戲已經好多年,但自己從來都無發現,原來呢一種「猜心」嘅遊戲係咁好玩、咁有趣。
 
拎起隻牌,認清自己嘅身份,然後望一望身邊嘅人,開始估我同你哋係唔係朋友,抑或係敵人?我哋有冇共同目標,定係大家一早就注定要傷害對方。
 
我諗大多數人都中意做預言家,喺所有人都未知世情時,你已經可以知道部份真相。但就算知道真相後,我又唔知可以信邊個。我要小心奕奕咁避過所有傷害,最後喺勝利之前搵到共同嘅人,講出一句對方會相信嘅說話,然後一齊勝利,感覺幾好。
 
又有啲人中意做女巫,手拎住一支毒藥,我就可以隨心所欲咁毒死任何一個人。呢一種基於保護嘅心態,令到我哋喺路上面稍稍好過,講到底,邊個都想保護自己,邊個都唔想傷害別人。
 
如果妳傷害我,我希望自己可以先毒死妳。
 
做個獵人好唔好?呢個神職係最瀟灑,任何人傷害我,我喺死之後都保證能夠帶走一個人,厲害嗎?我比女巫更厲害嘅係,我唔怕妳暗算,妳只要求神拜佛,妳殺死我之後,千萬唔好俾我搵到妳,我一日搵唔到妳,我就用我一世嘅時間去搵妳,因為咁樣我先覺得日子過得好,唔會有遺憾。
 
邊一個都想做騎士,我可以查妳係唔係壞人,如果妳係好人,我大不了一死,但如果用我條命可以証明到妳曾經來過係咁美好,我死又有咩所謂?如果妳唔好,我可以殺死妳,雖然我手中再無劍,但至少我殺死咗妳,妳呢個壞人。
 
世界太多狼,但無奈狼係必然存在,有黑有白,有正有邪;今日我哋變白,聽日妳亦都唔會必然係黑,狼點解存在,因為基於每個人都有陰暗面,妳好愛我可惜我唔一定會好愛妳,感情有落差,世界就會開始變。
 
我哋都討厭狼,但我哋都會變狼,每一局遊戲入面,我哋都搏命咁做狼、搵狼或者係殺狼。過程刺激緊張,但遊戲一完,之前種種嘅咬牙切齒,你都發覺只會係南柯一夢。
 
薛可正Facebook Page
http://www.facebook.com/sithoching
IG:sithoching

COMMENT