2019/05/03

男人的Fantasy (二二五)球愛不遂

25264487783_600x399

網上資料圖片

我係利物浦迷,前晚睇完佢哋歐聯作客輸俾巴塞隆拿三比零,個心情非常肉酸,睇完波之後走上網行個圈透透氣,先醒起宜家網上已經唔係一個透氣嘅地方。

好多利迷輸完波,開始Target目標出吓氣,我開頭以為係古天奴,估唔到今次係蘇阿雷斯。

可愛嘅阿蘇,喺紅軍年代,出咗名有Heart、勤力仲夠情義。放得佢落場佢一定搏到盡。當年喺球場咬到對面後衛成個牙印,幾多人對佢又愛又恨,然後佢去到利物浦最後一季,差唔多係一己之力帶住成隊波,面向當時嘅軒達臣呀、史杜歷治等等球員以身作則,走之前仲簽份約,等紅軍賣個好價錢,好來好去。

「好來好去」,成件事根本就係南美人穿洲過省打工幾年另謀高就最後好來好去囉。好多人喺佢走咗之後,開頭又要形容到佢身在曹營心在漢,有啲又話睇得出佢喺魯營踢波踢得好唔專心,無咗喺晏菲路時嗰種快樂。

我當堂黑人問號,係咪要一轉會場場比賽就算帶波快放落底時都要笑到智力有問題咁,先算係開心?好多人仲話會一世當佢係屋企人咁,呢個時間少不免又要拎「利迷鞭屍聖器」奧雲出嚟做個比對,彰顯阿蘇有幾咁崇高,幾咁親切。

但時過幾年,阿蘇喺魯營唔開心唔開心又踢咗第五年,又一次對利物浦,但今次有少少唔同,利記真係俾巴塞迅雷不及掩耳嘅情況下整咗場三比零,好多利迷接受唔到嘅情況下,開始鬧阿蘇挑釁、佢多小動作、佢對舊會唔尊重仲有最大罪名就係「佢使唔使咁呀?」,使唔使點即係咩意思我唔知,總之就係佢使唔使咁?

足球比賽喺有電腦之後,真係有好大嘅變化,從前我哋比較純粹,一個星期一本足球雜誌,一小時足球精華,兩個星期一場直播,已經係我哋最好嘅娛樂。宜家有internet,大家可以接收好多消息,有球會消息、轉會消息、小道消息仲有好多假消息。反正大家都唔介意,然後好多人開始抽絲剝繭咁樣剖析整個足球世界,某某同某某嘅關係、邊個經理人貪心、聽講邊個開波前吸毒等等……

有時又會剪吓啲短片出嚟,慢動作逐格睇邊個出醜,由網民私下分享笑笑就算,去到宜家有體媒專搵球員出醜嘅短片,或者係邊隊仆咗街嘅賽果。今次利記輸咗笑吓佢等曼迷like,下場曼聯輸咗又整條片等利迷Like,足球世界,淪落至此,唔可以鬧邊個,只可以講係球迷嘅一個選擇。

最後聽到好多球迷話蘇阿雷斯〈重申,係好多個,唔係單一針對一個,無人需要咁重要〉同古天奴唔會係利物浦名宿。我就話佢哋做唔做到名宿,唔係一場波或者一件事去決定,無人可以係Thanos,唔係你哋噠一噠手指,所有事都會煙消雲散,奧雲就係一個活生生嘅例子。

所以和而不同,只係香港人對住共產黨先會識講嘅四個字。

薛可正Facebook Page
http://www.facebook.com/sithoching
IG:sithoching

COMMENT