2019/05/25

男人的Fantasy (二二八)《阿咩吉場》

unnamed-1
 
網上資料圖片
 
某晚無聊嘅一個Google,又將我拉返去十八年前嘅時光。
 
某晚失眠,慣性去高登睇睇,睇見高登CEO林祖舜先生曾經特意錄製咗一條短片,原因係高登討論區內有一位巴打因為厭世而自殺,有其他會員出帖討論呢件事,不過帖內嘅討論卻充滿大量嘅負能量。
 
林祖舜睇見這個氛圍,特登想用一條短片來勉勵一眾巴打,希望其他有自身問題嘅巴打不要依附喺呢個負面氣氛裡向困局死鑽,退後一步,你總可以睇見更多光明。
 
短片中林祖舜講咗一個經歷,講到以前有一個媽媽,因為要幫已離世嘅女兒打理好佢嘅網站。所以就算幾辛苦,都決定要喺中年起步,要林祖舜教她電腦知識。
 
一聽到呢件事情,我就諗起楊媽媽同『阿咩吉場』。
 
『阿咩吉場』係一個叫阿咩嘅少女所製作嘅網站,成立時間應該喺千禧年左右,當中記錄咗阿咩嘅生活中所有點滴。
 
甜、苦、酸同辣嘅,都可以喺網站中以文字同相片一一了解。後來,阿咩得到癌症,不過佢無消極落來,反而努力面對。喺可以離院回家嘅時候佢會努力更新網站,放吓同哥哥嘅生活照,又或者係去萬聖節嘅鬼娃娃造型。
 
到二零零二年初,阿咩就無再更新網站。
因為六月嘅時候,阿咩離開咗這個世界。
 
喺這個時候,楊媽媽二話不說就繼續打理『阿咩吉場』,由於電腦知識所限,喺初段時間的確係非常辛苦,不過佢無放棄,反而係一步一個腳印咁將網站慢慢改進,後來更兼併了佢自己嘅繡織生意喺網站內,一舉,兩得。
 
我係喺楊媽媽開始打理網站時才知道『阿咩吉場』嘅,所以唔可以透過電腦去同阿咩講一聲打氣嘅說話,係我一直覺得遺憾嘅事。後來我差不多每隔一段時間就去『阿咩吉場』睇一下,呢個習慣維持咗幾年,後來人忙咗,真係有過唔記得咗呢個網站嘅時期,好在CEO嘅一條短片將我嘅記憶返來了。
 
網站內,有一篇係阿咩爸爸喺阿咩過身後發佈喺網站上嘅悼文,裡面講到阿咩係阿咩爸爸嘅一個夢,但呢個夢,卻來去匆匆。字裡講到嘅,除咗係一般父女之情,仲有嗰一份佢們都曾經為阿咩病情而歷練過嘅回憶。睇住阿咩爸爸有一次因為去醫院碰上大雨而全身濕透,要到醫院入面換病人服頂替嘅照片,照片入面佢們兩父女無為不幸事情而無限放大。反而及時行樂,一齊著病人服來個笑容照。
 
佢們陪住阿咩走完人生最後嘅路,然後唔係讓她化作一縷白煙,而係用她留下來嘅心血,沿著呢條路,咬著牙,一直走落去。
 
真真正正做到,人死,燈都不滅,與我常在。
 
看完呢度,再睇睇鏡入面嗰個最近被負面情緒折騰到愁雲慘霧嘅薛可正,不禁問問自己一句:「你仲唔夠幸福?」
 
薛可正Facebook Page
http://www.facebook.com/sithoching
IG:sithoching

COMMENT