2019/05/31

男人的Fantasy (二二九)四十而立

1550765886-ZRiIWvhaBE
 
網上資料圖片
 
我人比較遲熟,起點比較慢,希望自己能夠做到四十而立,已經好開心。
 
唔經唔覺,就進入咗四十歲。同當年差唔多三十歲一樣,未踏足呢個歲數前好驚,一行過咗,就唔知驚乜,然後又高高興興咁過咗呢十年。
 
三十歲後呢十年對我嚟講,翻天覆地。
 
由擁有一個家庭到離婚;
由一間屋幾個住到獨居。
 
轉咗一半行,唔小心細個許落要做導演嘅願望都實現咗,但總係喺外人認為好成功嘅呢段路上面,我搵唔到太多嘅成功感。
 
或者係呢十年我嘅路,因為幸運又發生嘅事太多。只有運氣,好多事你都會唔夠信心,個人一唔夠信心會點?就會心虛,一心虛就做好多事都唔會有成功感。
 
生活入面貌似成功,但實則毫無成功感,大概就係好多男人生命中最常遇到嘅事。
 
男人有心事,酒同兄弟呢啲就係定律嚟。
 
我有個老死,嗯……叫佢強仔啦。強仔都係呢一行嘅朋友,佢年紀比我大好幾年,運氣唔夠我好,起步比我更遲,但個天就係公平,拋低本來專業嘅佢,為咗喺娛樂圈闖一番事業,就算係年過四十,佢都邊做邊學。
 
呢個世界好簡單,有運氣就無毅力,愈無運愈堅韌,等到有一日你運氣返嚟少少,你嘅收獲都會係其他人嘅翻倍。
 
強仔嘅邊做邊學,係包括同好多年紀可能比佢細一大截嘅朋友仔,就好似學戲咁睇,其他同學個個都青春無敵,可能強仔相比下會略顯成熟。
 
「咁點呀?」飲酒時我問佢,因為換轉係我,可能連堂都唔會上,我抵受唔到呢種「非戰之罪」嘅氛圍。
 
「無咩點,專心上堂囉。」強仔答得輕鬆,但我知道呢一份絕對係時間剩低嘅歷練嚟。三十歲四十歲之後唔應該去學嘢,其實只係我哋呢啲星斗市民一廂情願嘅想法,根本就唔實際。
 
踏入四十歲,我有好多事想做想學想試。每一次我因為個「四」字而卻步時,我都會諗起強仔。佢正面嘅人生觀一直影響住我,佢就好似係我一個燈塔咁,一迷路時望望佢,就好似搵到方向。
 
有一晚飲酒,我忍唔住向強仔講,我當佢係燈塔嘅事。強仔飲啖酒,輕描淡寫咁講:「其實我都有好多問題,成日都會有好多猶豫……」
 
「但係你永遠都唔會放棄。」我由衷咁舉起姆指。
 
「無得揀。」
 
「強仔,其實有得揀,但你老早揀定堅持。我本來都有得揀,我差少少就揀咗放棄,但因為你呢個燈塔,我同自己講無得揀。」
 
「哈哈…」
 
「無得揀,做男人,解決問題就OK,其他事就好似時間咁樣,由得佢過就得。」
 
薛可正Facebook Page
http://www.facebook.com/sithoching
IG:sithoching

COMMENT