2019/06/08

男人的Fantasy (二三零)重回書展

1.2.7.3-HK-Book-Fair_03
 
網上資料圖片
 
身為一個作家,每年一到七月,就會特別忙特別尷尬。我意思係,你一係特別忙,又或者係特別尷尬。
 
忙,係因為你有書出,你要寫書,你要幫手睇設計,同出版社溝通,有時仲要傾埋宣傳,忙呢?
 
尷尬,係因為你無書出,你喺屋企會有網友問你有冇書出,你行出街見到朋友會問你有冇書出,就連你有時都會問自己,幾時先有書出。
 
不過大部份香港作家比較好,因為我哋都唔係全職作家,所以無書出,極其量係無咗一份兼職,分分鐘仲係時薪少過做便利店嘅人工,所以生計上,有冇書出,對我哋唔算好大影響。
 
只係每次當我無書出嗰一年,我都會同自己講:
 
「今年唔去書展!」
「今年唔去書展!」
「今年唔去書展!」
 
但每次一到七月,我又會諗:
 
「算啦,去支持一吓朋友都要啦。」
 
無錯,人總係要犯同樣嘅錯。每年到最後我都係會去嘅,而最後都會遇到一個好尷尬嘅問題,要排隊入場!
 
可能有人話,你好巴閉咩,寫過兩本書就當正自己指吓個鼻就可以入去呀,無書出你咪係平民百姓,排隊買飛啦契弟。
 
但又真係唔係好巴閉,只係人嘅劣根性就係,你曾經試過無遮無擋真係鼻都唔使指一吓就入到去嘅地方。第二年竟然要排喺百萬人群中等個你死我活先入到場,你就會覺得好辛苦。
 
呢個係正常,唔關我巴唔巴閉事。
 
想搵以前嘅出版社,又怕人哋唔得閒;到人哋話得閒,你等多兩秒自己又會唔耐煩。呢種咁糾結嘅情緒,喺一個關自己事又好似唔多關自己事嘅地方,每每就係我哋呢班過氣作家嘅真正潛台詞。
 
所!以!
 
廣告時間嚟喇,今年小弟破釜沈舟,終於都有書出喇。經過千辛萬苦,我終於完成我第六本作品「孫悟空」嘅稿,如果無咩意外,2019年嘅書展就會見到佢嘅出現。
 
今年唔使糾結!唔使諗去唔去書展!唔使諗有冇人帶我入場!
 
雖然好似講到好辛苦,但其實每一年入書展都係好有愛嘅經驗。無書出時恭喜吓其他朋友;有書出時就多謝吓其他朋友。
 
用書換書嘅方法交換友情,係幾窩心。
 
有時睇返呢六年嚟書展換返嚟嘅朋友作品,每一次相遇,都係大家嘅一種回憶。
 
2019書展,等埋你。
 
薛可正Facebook Page
http://www.facebook.com/sithoching
IG:sithoching

COMMENT