2019/06/15

男人的Fantasy (二三一)呢個係絕對講唔過去

32016ecc-12c2-4005-ac51-62c54e0bff29
網上資料圖片
 
「呢個係絕對講唔過去。」
 
呢幾晚一靜落嚟時,我個腦都會諗起呢句說話。
 
我好少會提及政治,因為我覺得自己嘅政治知識未足夠到可以有太多建設性。社會就係太多無建設性嘅說話,所以先會有太多噪音。
 
我討厭泛民,我討厭毫無成本但又要立功作威嘅人,就好似我好討厭啲無行出街但喺網上指指點點嘅唔同路嘅人一樣。但人大咗,你知道就算爭辯都係無結果,唔同路嘅人最好就係大家好似平行線一樣,永遠都唔好交接。
 
所以我無遊行,明知道為其他人抬轎,我又唔需要影張相放上網表示自己有為香港出力,所以我一直用自己方式去生活。
 
我覺得讀書就係學道理,道理會令你人生四通八達。
 
但六月香港最亂嘅一日,喺新聞入面見到好多畫面,我都係想去到現場,希望可以支持一下付出成本去為自己發聲嘅人。
 
現場所見到嘅事,唔詳述喇,唔快樂嘅事呢幾日喺網上已經見到好多,香港人受傷嘅相我睇完一次又一次,布袋彈如果打頭,真係有可能致命。到後來大家都知道唔使「如果」,佢哋嘅槍,的確係向住我哋嘅頭打。
 
現場氣氛激烈到,連我呢個大人都唔敢走到最前。我走上天橋,見到好多走上前嘅,都係年青人。從佢哋嘅服飾到姿態,都可以睇得出嗰一份稚氣。世界真係好矛盾,帶住稚氣嘅人,全部都走到最前,做最勇敢最肯付出嘅一位。
 
混亂過後,返到屋企見到好多資訊。好多人話呢班年青人係暴徒,上到最前搞事,收錢、搗亂、禍國、殃民。
 
「呢個係絕對講唔過去」
 
你哋可以話佢哋年青、衝動。但面對槍口之下,金錢唔會係令到佢哋走上去面對嘅原因,因為持呢個講法嘅人,唔會明白當日嘅情況。
 
喺時代巨輪之下,佢哋可能會為自己嘅行為付上代價,但呢個就佢哋人生,佢哋頂天立地嘅決定。
 
認為世界上所有事都可以用金錢出賣嘅人,本身一定係好喜歡錢,或者係道德觀非常低。因為佢哋嘅世界係接受呢一套,所以先會有呢個想法。
 
呢一日,我覺得好悲哀,但亦感到好驕傲。
 
薛可正Facebook Page
http://www.facebook.com/sithoching
IG:sithoching

COMMENT