2019/06/21

男人的Fantasy (二三二)我們與惡的距離

2019_06_21_Sit
網上資料圖片
 
最近忙完書展新作,終於有時間可以睇睇新劇減壓。HBO嘅台劇「我們與惡的距離」推出好幾個月,一直都聽到好多朋友好評,最近兩晚終於可以開始睇。
 
睇完兩晚,感覺好揪心。原諒我用呢個比較唔港式嘅形容詞,因為呢一套劇就係用一單隨機殺人案貫穿幾個家庭,每一個家庭都遇上人生最難面對嘅事,所以整套戲無咩時間俾你輕鬆,總係要緊湊咁追住傷心落去。
 
台灣近年都時有隨機殺人嘅案發生,殺人狂魔被捉到之後,距離死刑前嘅一段時間,社會一定有好多聲音。喺呢種幾乎一面倒嘅聲音之下,殺人狂魔嘅辯護律師喺抗辯嘅過程入面,想搵出到底係乜嘢原因令到一個連貓都怕嘅年青人,會去到一間戲院入面隨機殺人。
 
好多人鬧呢個律師變態,連佢家人都唔明白佢。有人覺得佢貪錢,為咗錢專接呢啲死有餘辜嘅案件。但律師其實只係想去接近呢種殺人狂魔,去理解去分析,埋藏喺我哋人類身體入面嘅「惡」,係點樣形成,又點樣爆發。
 
只有預防,先可以杜絕。
 
呢套劇係絕對值得睇,劇本鏡頭已經非常好,用接近生活嘅拍攝手法,去剖析生活入面當我哋遇到大事時,大家嘅反應同選擇會點。好多幕我自己一個人都睇到流眼淚,有時因為感動而喊,有時因為感覺到呢個世界同「惡」嘅距離原來咁近,會傷感而喊。
 
我哋每一個人,同「惡」嘅距離有幾多?
 
有冇試過妒忌而誣告其他人?
因為知道對方善良而發佢脾氣?
喺無人知道嘅情況下偷其他人嘅財物?
上網用唔同嘅身份去攻擊人?
周圍分享其他人嘅祼照仲自覺理直氣壯?
 
我哋有,我哋都總有呢啲事。
 
怨氣係會傳遞,亦會類存。生活入面大小事,我哋都總可以用一句自己無錯就理直氣壯咁唔理其他人感受,係可以嘅。但其他人都一樣可以,最後世界所有關係就演變成爾虞我詐,愈來愈「惡」。
 
我要開始睇餘下嘅集次,希望我可以睇到一個比較好嘅結局。但無論點都好,呢一套劇都會一直提醒我,我哋人生在世,每日過嘅都係情緒主導嘅日子,要年年刻刻提住自己,
 
我們與惡的距離。
 
薛可正Facebook Page
http://www.facebook.com/sithoching
IG:sithoching

COMMENT