2019/06/28

男人的Fantasy (二三三)音樂狂人

2019_06_27_Sit MenClub
 
最近收到一位新朋友送上大作,呢位朋友我唔識點去形容,因為我之前同佢素未謀面,但幾乎所有佢嘅事業上成就,我都親眼目睹。
 
收到「音樂狂人」呢本書時,係我第四次同陳少寶先生見面。如果熟悉香港樂壇嘅朋友都知道,少寶〈當事人要求我可以扮Friend直接叫佢少寶〉係寶麗金同新藝寶唱片公司最輝煌時代嘅一位重要人物,譚詠麟張國榮王菲同Beyond等等巨星都曾經同佢合作過,無數喺我童年時曾經出現嘅金曲,都係佢參與其中嘅作品。
 
我哋第一次見面,對話都唔算不上係討論,大多數都係我問佢佢答,因為我實在太想知道當年嗰個香港音樂輝煌嘅盛世。當我接過佢嘅大作,第一時間返屋企用一晚通宵睇哂佢,我先知道當年我十幾歲時極度迷戀嘅台灣文化當中,福茂唱片竟然就係寶麗金喺台灣開嘅分公司;仲有正東公司嘅由來,好多我細個唔知度背景嘅音樂故事,我都喺呢本書入面睇到。
 
特別係睇到有一段,佢同歌神許冠傑合作嘅「心思思」大碟,就係我同我姐姐第一次夾錢買嘅卡式帶。呢啲故事閒閒哋都有三十幾年,我幾歲開始每日返學前,清晨六點幾等緊阿媽煮早餐時,睇住家姐吹頭返學,部卡式機就一路播住校長嘅「你要等我~等我~」,呢啲畫面,仲係一幕幕咁安放我腦入面一個永遠都唔會忘記嘅位置。
 
我立即用短訊向少寶分享,種感覺真係萬語千言。
 
又好似我第一次睇嘅演唱會,就係王菲嘅「快樂聖誕」,十五歲嘅我拎住兩張飛,就同我最好嘅朋友由土瓜灣搵巴士上紅館。王菲唱「夢中人」跳出嚟嗰吓,我覺得佢係世界上最靚嘅女人。
 
但我點會估得到,原來當時少寶就同竇唯兩個喺後台入面吹水,仲要傾傾吓竇唯要準備上台吹蕭,再見都無講就走咗去。
 
睇呢本書,就好似人生回憶嘅一種結合,真係好過癮。
 
但講明呢一個唔係一個廣告,而係呢本書對我嘅衝擊實在太大,人生活到呢個年歲,仲有咩書係可以你拎上手時已經唔想放低?平時我都係自己一個睇住YOUTUBE聽聽舊歌去懷念以前,睇住呢本書發覺原來我嘅舊記憶係仲有機會補完,有咩法子會唔開心?
 
我睇嘅係簡體版,希望可以盡快有繁體版,令多啲香港朋友可以睇到,當年香港樂壇係如何輝煌。
 
薛可正Facebook Page
http://www.facebook.com/sithoching
IG:sithoching

COMMENT