男人的Fantasy (二三四)做老闆好？做奴隸仲好呀!!
網上資料圖片
好多人(包括我WhatsApp group好多朋友)成日同我講：「喂，阿正你就好啦，做老闆開舖頭，想幾點起身就幾點起身。」
我次次聽到呢句說話都不禁答一句「朋友，你實在太年輕喇。」
首先，你哋唔好將「做老闆」同「做富翁」搞錯。李嘉誠嗰種簽吓文件巡吓公司嘅叫「富翁」，我哋呢啲開間舖頭仔做到仆哂街嘅呢，叫「老闆」。老闆就好似係一個職位嘅名，你哋成日話朝朝都要起身返工，其實咁咪好囉，咁咪即係你地有返工同放工嘅時間囉。
做老闆嘅，幾時返工呀？有事要你理嗰時就要返工。就算你個人未返到舖頭，起身一刻你都要含住支牙刷覆WhatsApp，我有幾次試過屙住屎覆WhatsApp，最後想拎廁紙時爭啲就跌咗部電話落屎坑。
趕頭趕命，最後返到舖頭。一班小伙記就會向你衝埋嚟…
「老闆啲外賣匙羹用哂呀。」
「老闆我有小小肚痛想請半日。」
「老闆頭先有客話啲牛肚無牛味。」
「老闆，你今日返嚟做咩呀老闆？」
「老闆，我想加人工呀老闆。」
幾個人，同一時間向你轟炸。總之你一行入舖頭一刻，所有人都會依賴你，所有嘅事都變咗由你做決定。我開嘅舖頭叫「鼎點」，即係中環嗰間「Dingdim1968」，舖頭細細但平時生意都幾好，有時間可以上Facebook睇吓我哋個Page。
舖頭仔濕碎嘢多，好多時連飯都無得食，到有得食嗰時，又好彩好好生意無枱俾你坐。有時你想消費吓食得好少少，行上soho食西餐。一坐低無耐，小伙記可能就打個電話嚟：
「老闆呀，食環署嚟咗。」
「吓，咁點呀？」
咁點？咁咪將你嗰個中環一百二十八蚊嘅海鮮墨汁意粉格硬打包囉，再返到去做哂所有嘢再凍哂先放入口囉。
當你哋日以繼夜夜以繼日咁做到仆街時，每個伙計都同你好搏命。月底，佢哋開開心心拎住佢份人工，諗緊買多對350好定係唱次咸K嘅時候，你先將盤足足三十日儲埋一齊嘅數計好，最後先發現今個月唔係太好生意，自己嘅盈利可能得幾千蚊左右。
跟住第二日凍肉佬會同你講：「呢個月啲豬貴咗呀，要加5個%呀…」
你乜都唔可以講，只可以點點頭同佢講無問題，跟住再諗吓下個月有咩地方可以節省到開支，去冚返呢條隔夜嘅豬肉數。
「做老闆」就係一條咁嘅路，但我都會同身邊好多想創業嘅年青人講如果有能力輸得起嘅都應該試吓創業，因為對一個男人嘅眼界嚟，真係有唔少嘅幫助。
薛可正Facebook Page
http://www.facebook.com/sithoching
IG：sithoching