男人的Fantasy (二三五）斜槓人生
網上資料圖片
最近睇咗一本書，叫「斜槓青年」，其實呢一個名稱唔係新事物，有好多媒體都報導過，只係我個人比較慢，所以最近先睇呢本書。
而書入面所講嘅嘢，亦都係出現咗好多年，連我自己本身，都係一個「斜槓中年」。
「斜槓」係指時下好多人，都唔會俾一份工作綁死，但佢哋又唔係創業，只係將自己平時工作時間，分配俾幾份唔同嘅工作，而同時喺工作環境上，可以盡量靈活，唔使綁死自己嘅時間，令到自己嘅生活可以有所改善。
最簡單一點，如果每日可以遲一個鐘出門口，避過幾百萬人次嘅人龍，再上車可以瞓個靚覺，你嗰一日嘅人生已經足夠畫上完美句號，咩話你問我有冇咁誇張？你試吓經歷住屯門要返中環，每日唔可以Miss七點四十分嗰班車，仲要上到車無得坐，有時仲要塞車搞到要好似吊頸咁搖吓搖吓咁瞓吓醒吓，我前世做錯咩呀，點解返工都要咁辛苦呀？
當然你有一程完美返工車程後，只要你做哂自己嘅工作，就可以提早放工，係咪好不可思議？「斜桿」就係追求呢啲好似本來係應份，但又從來無喺我哋生活中發生過嘅事。
大家都知道，有錢可以改善生活，但大部份人一世都係窮忙，又窮又忙。不過係咪人生定咗我哋條路，我哋就唔可以定我哋快樂度？我覺得又可以盡吓人事。
美國好多新一代已經開始推行呢一種生活，好多新世代嘅老闆都好開明，舊派嘅打卡返工放工模式已經令好多追求生活嘅員工唔嚮往，佢哋應該自己快手快腳做晒所有工作，又或者係同事之間互補長短，咁樣可以令公司運作得好之餘，自己人生亦多返好多時間，最重要公司嘅士氣會特別好，最好受惠嘅，都係老闆自己。
近年大家都對「有冇得揀？」呢個命題糾結，正如前文咁講，係咪我哋生喺一個唔有錢嘅家庭同國家，就等如我哋人生一定唔夠快樂？我哋有冇一個方法去改變呢個情況，甚至變成一個風氣，令到大家每日返工都係快快樂樂，唔使每個週末過後都好似世界末日咁，要計住捱幾多日先可以再放假呢？
好多年前我已經揀咗自己行呢條路，我將自己嘅工作分做好多身份，每日可以會逼到無時間食飯，但忙完一兩日後，我可以揀自己放返一兩日假，唔使太大生活壓力。
可能有時會有高低，收入未必係你心目中一樣，但無咗最主要嘅工作壓力，人生就變得容易快樂好多。
介紹俾大家嘅一本書，「斜槓青年」。
利申：非廣告
薛可正Facebook Page
http://www.facebook.com/sithoching
IG：sithoching