男人的Fantasy (二三六）再一次惡夢
網上資料圖片
書展唔經唔覺已經開始，今年我有一本新作叫「孫悟空」，如果大家會到書展，可以到「藝文青」呢個出版社幫襯一吓，但書嘅內容，我就唔喺呢度多介紹，畢竟呢度唔係廣告燈箱。
最近家母患病，所以令到自己情緒都唔算太集中，媽媽六十有四，唔係年輕但絕對唔可以叫老，我覺得自己都仲係一個細路咁，所以一路都唔覺得阿媽會老。
但我哋唔覺得嘅事，多數都會嚟得好快、好急…
同好突然。
媽媽一直都有久咳嘅情況，因為佢有自己嘅信仰，所以求醫方面我一直都唔俾太多意見。直到佢嘅身體去到出現警號嗰一刻，我先醒覺原來唔係一件小事。
從來都無想像過，我要用輪椅推住一個虛弱嘅媽媽去醫院。因為身體太差，氣力不足，所以我要用輪椅將佢送到醫院。
去到時，醫院第一句已經問：「婆婆，身體有咩唔妥？」
嗰一刻我個腦好似有道光，閃去十一年前，我陪爸爸去醫院時，姑娘嗰一句無心嘅「伯伯」面前。十一年前我爸爸最後都係離開咗我，爸爸離開後，其實我好珍惜同媽媽相處。特別係後生時成日都會同佢嘈交，近年都可以叫做學識用「服務業嘅微笑」，去應付媽媽有時嘅攻勢。
而我仔仔一路成長，大家有好多回憶都係開心。一齊食飯，一齊去旅行，我嘅人生從來都唔算幸福，但呢十幾年，我同媽媽嘅相處已經彌補好多。
而且每次睇住佢將我寫嘅書放整齊，又或者係嚟我電影首映禮，我都知道，我應該多多少少都有令佢光榮過一刻。正因為係咁，今次媽媽嘅病，令我更加手足無措，完全唔知可以點做。
當年爸爸有病，我一直都覺得自己做得唔好。好多時性格使然，永遠做唔到一個好嘅決定，最後令自己好多後悔。所以今次媽媽生病，我已經準備好一個心情，去好好照顧佢。可能我呢個不孝子口中所謂嘅「好」都係別中嘅十份一，但至少自己都要知道應該點做。
呢一篇文章講得上文不成文，完全係一篇垃圾流水帳，因為我完全組織唔到，到底自己想講乜嘢。我只係想媽媽身體健康，陪住我同阿仔一直生活。
未來嘅事都要一切樂觀，明天一定會好好。
薛可正Facebook Page
http://www.facebook.com/sithoching
IG：sithoching