男人的Fantasy (二三七)第一次打交
網上資料圖片
細個住屋邨，特別怕事。我住喺屯門，當時係新發展市鎮，好多唔同嘅人。成期時，成日都聽到，呢一座有班黑社會好惡，嗰一座又有幾個差仔成日打人，細個成日都求神拜佛，唔好遇到呢班人，如果唔係就好麻煩。
無錯，係好麻煩。
後來有幾次落街玩，真係同朋友一齊遇到呢類人。輕則身上面嗰十幾廿蚊就俾人搶走，重則嘅俾人打幾巴。我份人比較滑頭，好少會打我，多數都係打最多口駁咀嗰幾個。
有一次我哋幾個朋友又準備落街玩，坐電梯落樓下前，我哋有幾句對話。
「又遇到班差仔咁點？」〈抱歉唔好鬧我種族歧視，當時對話的確係咁〉
「咪走囉。」
「走唔甩呢？上次阿明先俾佢打咗兩巴。」
「還手囉。」
「還手？好麻煩架。」
「麻煩？麻煩得過俾佢哋打完仲要搶走啲錢？」
最後呢句說話，係阿明講。阿明係一個俾我更怕事嘅人，個人生得高，但膽就生得細。班差仔打佢嗰日，我認為純粹係因為佢生得特別高，特別有威脅。阿明俾人打嗰日我哋無一個人敢幫佢，因為我哋都驚，唔知道還手之後會發生咩事。
直到阿明俾班人打咗兩巴，其實有兩個星期既星期六日，我哋都無見到佢出嚟玩，我知道佢嬲咗我哋。
阿明講完呢句說話之後，大家走入電梯。電梯入面大家都不發一言，感覺好尷尬，我特別想向阿明講聲對唔住，因為我上次無幫你出頭。
直到我哋喺球場踩單車，真係遇到之前班差仔。佢哋一行埋嚟就推阿明，我唔知邊度嚟嘅勇氣，大叫咗一聲：「喂，推咩呀？」嘩，我真係勇敢。
成班差仔圍住我，跟住就行埋嚟，有幾個仲食緊煙。
嘩，食煙呀，知唔知嗰個年代食煙係幾十惡不赦嘅事，佢哋一定係黑社會嘅重要人物嚟。
為首個差仔走埋我度，講都唔講就向我塊面打一拳，我向後一閃，但佢呢一拳都仲係打中我眼角。阿明見到即時上嚟幫我推開嗰個差仔，個差仔電光火石間跌喺我身邊，嗰一刻，我同佢好近距離，近到突然之間諗起之前佢對我哋嘅惡形惡相，我好嬲咁一鎚打落佢塊面度……
最後我哋一班人同班差仔，由被恰變成打交，今次都叫打出咗成績，大家都流住少少血咁走，真係有進步。離開之後，我哋一班人走咗去後樓梯，大家繪聲繪影咁講返頭先打交時情況，之前嘅尷尬一掃而空，換嚟嘅係愈來愈好嘅感情。
自從呢一次之後，我仲係唔太鍾意打交，但我已經變到唔抗拒打交。以前怕麻煩而會唔想打交，但後來先發現，呢個只係一個自己驚嘅藉口。每個人都要為自己返設一條底線，只要現實中有乜嘢越過咗呢條線，打一次交，先係避免麻煩嘅開始。
薛可正Facebook Page
http://www.facebook.com/sithoching
IG：sithoching