男人的Fantasy (二三八)悔婚的人
網上資料圖片
朋友最近悔婚，結婚前兩日，單方面向所有人宣佈悔婚。
一時間，成個世界好似要爆炸咁，講完悔婚後嘅佢，買咗一張機票，飛咗去台灣。閂咗電話，唔上Facebook，只用一部舊電話偷偷地用微訊向我求救。
「阿姐，我點救你？你Book咗四十圍酒席，妳姨媽喺美國飛緊返嚟，妳仲一聲唔出飛咗去台灣。」
「我唔想嫁。」
「我宜家梗係知妳唔想嫁啦，但妳咁嘅處理方法，似唔想做人多啲，我驚妳阿媽斬死妳。」
佢叫阿Mi，一個我識咗十幾年嘅朋友，我哋唔係經常見面，但有意見時總會問吓大家。
「我唔想嫁…」阿Mi只係重覆呢句說話。
「點解唔想嫁？佢有第二個呀？」
「無……」
都未講完，Mi就開始喊。佢三十幾歲，男朋友行咗六年，差唔多係生仔臨界點，就喺佢差唔多完成要趕住完成嘅人生大事之前，佢喊住咁話唔嫁。
我未見過Mi喊，更何況係大喊。
佢喺電話入面喊咗好耐，期間我試圖插幾句咀：
「佢有第二個？」
「妳有第二個？」
「妳發現佢原來爭人好多錢？」
「佢老母唔中意妳？」
「佢玩Tinder俾妳發現咗？」
統統都估錯。
Mi話俾我知，就喺結婚前一個星期，佢哋兩個約好食晚飯。喺呢一餐晚飯入面，男朋友開始講兩個人結婚後嘅計劃，例如會先暫住奶奶屋企，跟住生仔，生仔頭幾年奶奶會幫手湊住小朋友，佢地跟住儲錢買樓，跟住好多跟住……
Mi一路聽，一路覺得好驚，點解自己曾經嚮往嘅人生路，放喺眼前呢一刻，佢會愈聽愈驚。
佢唔想，去到最尾一刻，佢覺得唔想。
唔想過呢啲日子，唔想因為時間緊逼而勉強自己去做；
佢唔想結婚，佢唔想再同呢個人一齊生活。
「點解會咁突然？」我問Mi
「乜唔想呢一樣嘢會有預告咩？」
Mi覺得無，但我認為有。
Mi認識呢個男朋友時剛好三十歲，同前一個行咗八年嘅男朋友分開後好快就同呢個一齊。Mi當時都有同我講，其實唔太中意呢個男朋友，我意識到都係水泡之類老生常談嘅事，就無再多講。後來又見佢同呢個水泡游吓游吓又一年，中間聽過Mi好想同好需要結婚，但男朋友又吊兒郎當，直到今次婚事，我唔知係男朋友突然唔清醒定係Mi突然清醒，反正Mi無端端記返起，呢個男朋友本來就唔係佢嘅最好選擇。
因為選擇錯，而勉強一齊；打算用一啲事〈例如婚事〉去鞏固大家關係，直到最後先知，最後一度門打開咗，以後就要用幾倍力氣先可以將呢度門閂返埋。
所以Mi承受唔到呢個壓力，佢覺得喺香港就嚟透唔到氣，每日都係親友打電話俾佢問東問西，每一個電話就好似提醒佢一次要回頭是岸，最後佢走到台灣。
佢知道男朋友無錯，除咗男朋友慣有嘅唔細心同吊兒郎當之外，佢無犯下大錯。犯錯嘅係Mi自己，開始錯一段感情，維繫錯一段關係。
係咪好熟悉？好似我哋曾經發生過嘅事一樣？
最後Mi返到香港，當住所有親戚面前，講出自己所想。Mi媽媽係性情中人，當眾打咗Mi兩巴，牙血都出埋嚟。
Mi話好痛，但見阿媽轉身離開間屋嗰刻佢覺得好開心，佢知道阿媽唔會阻止呢個決定。
Mi知道自己對唔住所有人，特別係佢男…前男朋友。佢開心，悔婚之後佢仲分埋手，打算去台灣過新生活，佢話今次唔會再亂咁揀，就算佢幾趕時間都好，唔會再因快得慢，浪費人生。
薛可正Facebook Page
http://www.facebook.com/sithoching
IG：sithoching