男人的Fantasy (二三九)唔識講道理
網上資料圖片
最近呢兩個月，我成日問自己，到底呢個世界，道理係咪咁難見到？
最近城市都分成兩邊，我從來唔係一個非黑即白嘅人，喺兩邊當中，各有自己嘅朋友同親人，有時你見到佢哋張牙舞爪咁對立，有時係某一方劍拔弩張，有時又係另一方悲痛莫名。
有時企喺中間，我會一直諗，我到底可以點樣，將呢個裂縫拉返埋，令佢哋好似以前咁…睇到呢度嘅你哋，個口都已經講咗一句：
「你都低能，有咩可能？」
呢個評語，又真實、又沉重。
咁如果眼前情況我自己都控制唔到，我可以點做？我諗咗一段時間，最後隨住新聞不斷出現，我就發覺我跟本唔使諗，唔公平已經出現，我只要用我對眼，去分析去細聽，其實根本唔難發現，自己應該企喺邊一個位上面。
當我認為，一班賤種喺街上面拎住藤條亂咁打市民，執法嘅人唔係遲到就係轉身走，呢一幕咁嘅景象，沉重到我第一次為唔係切身嘅問題而失眠。
我唔係怕自己會係下一個俾人無差別襲擊嘅人，我係為已經發生咗嘅事而傷心；但更傷心，你會發現自己曾經認識嘅朋友入面，會將呢啲事評定做「抵死」。
呢一種二次打擊係最痛苦，傷口第一次破裂，永遠唔夠舊患加上新傷嘅痛苦咁透徹。你搵咗一百個原因，都解釋唔到，點解佢可以面不紅氣不喘咁講一句「抵死」？
好有違人性，好喪失理智，但慢慢我就知道，呢一種係圓謊。
好多人都清楚自己情況，亦都知道自己所需，就好似我哋坐住一間車直奔烏托邦，當我哋都滿心歡喜，以後要點享盡榮華富貴時，路中心有一隻牛行出嚟。
車速太快，停唔切；就算停得切，都可能會影響車上面嘅情況，宜家可以點做？所有人都開始諗…
「其實係隻牛啫」
「咁我都唔識佢嘅」
「睇落隻牛好似唔多健康，會唔會有病？」
「時間唔夠嘞」
當大家一齊考量到七七八八，道德線愈來愈低，你想打佢一鎚咁我踢多佢一腳都唔係好過份丫嘅時間，終於有人講一句：
「不如撞死佢。」
呢一句說話真係太好，全車人都高呼撞死隻牛，呢一隻係同大家唔認識嘅牛，係對我哋完全無影響嘅牛，只要架車夠快，一下撞開隻牛，大家就會繼續，向我哋嘅烏托邦進發。
呢一種想法，令到好多人搵唔到道理。只因為佢哋怕，只要唔小心執起呢個道理，就好似隻牛攔住架車咁，去唔到自己要去嘅地方，搵唔到自己想要嘅生活。
你只係一隻牛，就算你係一個人，只要我唔認識你，其實你死唔死，對我又有冇關係？
道德？有一車人陪我，至少有一車人同我同一標準，我有我嘅世界，你哋唔好阻住我。
我都唔識你，道理仲有咩用呀？
薛可正Facebook Page
http://www.facebook.com/sithoching
IG：sithoching