男人的Fantasy (二四零)手信
網上資料圖片
我有兩個感情好好嘅異性朋友，一個圈外人阿詠，從小一齊成長；一個圈內人阿寧，陪我呢個老新人由入行開始成長，陪過我經歷失敗咗嘅婚姻，同埋好多個失眠嘅夜晚。
要花多少少篇幅去講，呢兩個女人同我都無任何愛情瓜葛，佢哋嘅性格都非常討我厭，又冷暴力又高傲，但佢哋好不幸都係我好朋友咁解。
阿詠應該係我人生最親近嘅女性，有時我同佢嘅距離比起親人仲要近，因為親人都未必會好似我哋咁隨時開戰，只要見到對方唔順眼嘅事，即時開打唔使商量。
不過佢都對我幾好，每次去旅行，盡可能都會買手信俾我。但就好似我哋嘅關係一樣，相愛得嚟又要相殺，阿詠會極力買手信俾我同時，佢都會極力咁買一啲我應該唔會中意，又或者係唔等洗嘅嘢。
好多年前佢已經喺日本買漫畫廁紙俾我，其實份手信係精美，但因為太精美，所以根本唔會拆嚟用。最後廁紙不成廁紙，漫畫亦都無緣欣賞。近年佢開始轉風向，令我最難忘嘅係一支「醬油味可樂」，我份人係好怕兩極嘅事，咸甜嘅嘢好少可一齊放入口，所以呢份手信最後都係留嚟欣賞之用。
呢一種習慣，令到我好鼓勵佢去旅行，好想睇吓佢去到每一樣地方，點樣精挑細選一件明知我唔會中意，但又會一直放喺身邊嘅手信。
至於阿寧，佢就正常得多，佢同我一樣，其實都唔算太熱衷買手信嘅人，呢一點我自己係承認，因為又要周圍搵，搵到又唔知對方中唔中意，返到香港仲要約交收，都係一件幾煩嘅事。
但一向唔太表達情感嘅阿寧，內裡係一個對朋友極之珍惜嘅人，只要你開口同佢講要手信，佢點都會敷衍吓你。
就好似今次佢去台灣，我突然又想麻煩吓佢。但我最愛嘅洪瑞珍三文治，無論購買嘅時間、地點同保存方法都太麻煩，阿寧就算買咗都會鬧到我PK，我呢啲只係想掏個開心嘅人，都係叫佢買返啲普通嘅嘢就好。
「我要食鐵蛋。」
「咩嚟？」
「妳去搵吓，台灣一定有。」
然後我哋又閒話家常，我介紹佢去華山行吓，佢又同我分享喺台灣嘅所見所聞。最後我都知道佢未必會買到鐵蛋俾我，因為佢同我一樣，搵咗一次都搵唔到就會放棄嘅人。寫緊呢度時我收到阿寧訊息，佢同我講搵到嘅蛋太難保存，求其買一碌男性生殖器官嘅鳳梨餅俾我就算，我好開心咁話好，雖然呢舊嘢我八年前已經逼我細佬喺台灣街頭表演過生吞。
因為喺大家感情愈來愈容易放棄嘅年代，有兩個朋友每次去旅行都會買手信俾你，點講都係一個福利嚟。
薛可正Facebook Page
http://www.facebook.com/sithoching
IG：sithoching