2019/08/26

男人的Fantasy (二四五)我家

2019_08_26_Sit MenClub
 
圖片來源:STD
 
唔知係我唔本事,定係我太怕改變。咁多年嚟,無論我自己嘅人生高定低,又或者係香港好定唔好,我都無諗過移民。我想像唔到自己去到另一個地方,放棄晒多年來建立嘅人同回憶,去到一個我覺得生命會安好嘅地方,我會點樣過生活。
 
我係一個喺香港屋邨長大嘅男人。
 
成日都覺得自己好幸運,我趕得上七十年代最尾一班車,懂事期剛好係香港最盛世嘅時刻,每晚歡樂今宵開開心心過一晚,喺九龍城見過飛機喺頭頂飛過,去過青龍水上樂園,叫衛奕信做港督,最後睇住香港回歸中國。
 
香港回歸嗰晚,我同阿爸用咗好多盒錄影帶去記載呢一件未必個個人有機會見證嘅大事,我仲記得自己係聽住林海峰嘅「彭小姐」去望住呢個世紀時刻,睇住肥彭個二女上船,我覺得自己對未來充滿好奇,無錯我係一個幾無前瞻嘅男人,我永遠唔會太快驚人哋驚嘅事,因為我本來就覺得,所有事會發生就會發生。
 
雖然呢二十二年,香港一日比一日改變,以一個香港人嚟講,呢個改變絕對係差,好多身邊嘅朋友都話要走,呢個諗法令我諗到,我十歲左右時,香港都曾經因為九七而有過一段移民潮。
 
最後好多人走完又返,九七後返完又走,佢哋帶住「邊度好就去邊度」嘅心態,我唔反對呢種諗法,良禽又好劣禽都好,反正世界上所有生物都係擇木而棲,只係我做唔到,因為其他地方俾唔到香港「家」嘅感覺我。
 
由我呱呱落地一刻開始,我都好嚮往「家」俾我嘅安全感,以前無論去邊度,去幾耐,只要一踏足香港,無論發生咩事,個人都會定好多,安心好多。
 
就算呢個家一直改變,變到唔似我哋心目中嘅好,我都唔願意揀離開,去到另一個地方,唔快樂咁生活。
 
眼前係好多問題,但我哋仍然有同伴,呢幾個大家嘅成長,仲有香港人遺失咗好耐嘅香港心,都喺苦難入面慢慢體現。我哋都會有難過嘅時候,但同時都有感動嘅一瞬,我驚嘆你嘅勇敢,你多謝我嘅關心。
 
同舟人,誓相隨。
 
呢段說話只代表我,唔需要人同意。
 
我哋都要加油。
 
薛可正Facebook Page
http://www.facebook.com/sithoching
IG:sithoching

COMMENT