男人的Fantasy (二四六)無網
圖片來源：夠pop
「你有咩就call我啦，你寫低咗我新call機number未？」
「得喇，到時call你。」
趕住出門口嘅我，好快咁收咗我女朋友線，無辦法啦，我趕住拎份申請表去旺角，如果今日趕唔切，我就趕唔切參加個足球班交流，聽講有現役球星出席，不過上次收音機講嗰時我聽得唔清楚，一陣去到再問一問嗰度嘅人先。
頂你個肺，架巴士又遲，好在今日唔係好熱，啱啱打過電話去天文台，話今日29度，七月頭嘅天氣29度，可以接受啦，不過巴士可唔可以快少少嚟，係唔係要我打27454466去投訴？不過九巴呢個電話服務都算唔錯，上次我搵路，打電話上去叫佢Fax個路線圖俾我，都好快幫我搞掂，一個電話做到晒所有嘢，唔錯唔錯。
坐巴士係我平日最中意嘅節目，坐喺一架非常好風嘅巴士上面，沿途欣賞屯門公路嘅風景，望吓望吓就會瞓著。我話俾大家知，巴士瞓覺係最舒服嘅享受，如果無過站嘅話，哈哈。
不過今日我就有啲重要事做，因為一陣交完表格要搵女朋友食飯，而佢同我講，食飯前想睇返套戲，好在上車前我買咗份報紙，可以打開娛樂版入面，望一望有邊間戲院會上映女朋友想睇嗰一套戲先。
咦咦咦係喎，尋晚英超賽果我仲未睇，老死立仔仲打電話俾我叫我開有線睇波，但係老豆同阿媽睇緊無線個節目，搞到我不知幾無癮，原來咁大比數，早知打電話俾立仔，去佢屋企度睇啦。
諗吓諗吓，又到站要落車，我即時跑住去交表格，跑跑吓call機突然響，我女朋友做咩咁早就到，我仲未搞掂呀。我一望個call機：
「媽咪：今晚回來吃飯嗎？」
嚇死我，仲以為我遲到。我三步當兩步咁跑，終於都跑到交表格嘅地方，交完表格後，我再望到牆上面有關呢個次交流班嘅海報，原來真係有球星，仲要係我嘅偶像山度士，對上一次見佢已經係入去旺角場睇波，如果可以同佢近距離影張相，咁我就開心喇。
交完表格，我即時行入7仔涼涼冷氣，仲換咗兩個一蚊打電話。
「請問貴姓搵陳生？」
「機主覆機，密碼981276345。」
「媽咪call你，問你返唔返屋企食飯。」
「媽咪再call我，話佢知我唔返屋企食，夜晚返去買糖水俾佢。」
「無問題機主仲有冇其他？」
「女朋友如果call我，同佢講我喺旺角信和門口等佢，唔該哂。」
「無問題，覆一次女朋友call，同佢講機主喺旺角信和門口等佢。」
「係唔該你。」
覆完機，行咗兩步，見仲有一蚊，我再行返轉頭打多個電話返屋企：
「喂，阿媽呀，我今晚唔返嚟食飯呀，我去睇戲，今晚返嚟買糖水俾你同老豆，綠豆沙好唔好………仲有呀，叫老豆幫我錄九點半明珠台，係呀，重做星球大戰，我上次錄嗰盒俾老豆唔小心用咗嚟錄馬，好啦唔該阿媽……」
我曾經嘅無網世界就係咁快樂，驚你呀？
薛可正Facebook Page
http://www.facebook.com/sithoching
IG：sithoching